«Վրաստանը ձգտում է դառնալ ԵՄ անդամ, բայց ոչ ամեն գնով և իր շահերի հաշվին»․ Իրակլի Կիրցխալիա

Վրաստանը ձգտում է դառնալ Եվրոմիության անդամ, սակայն ոչ ցանկացած գնով և հանրապետության շահերի հաշվին։ Այս մասին հայտարարել է իշխող «Վրացական երազանք» խորհրդարանական խմբակցության ղեկավար Իրակլի Կիրցխալիան՝ պատասխանելով ընդլայնման հարցերով եվրոհանձնակատար Մարտա Կոսի հայտարարությանը, թե Վրաստանն այսօր միայն թղթի վրա է Եվրոմիությանն անդամակցելու թեկնածու երկիր։

«Ուստի, երբ մեզ ասում են, որ Վրաստանը «հետ է մնում» Ուկրաինայից և Մոլդովայից, մեր պատասխանը պարզ է՝ Վրաստանն ընտրում է արժանապատվությունն ու խաղաղությունը»,- գրել է նա՝ ֆեյսբուքյան իր էջում։

Նրա խոսքով՝ Վրաստանի իշխանությունները բազմիցս ապացուցել են, որ կարող են իրականացնել եվրոինտեգրման համար անհրաժեշտ բարեփոխումները, սակայն կան կարմիր գծեր, ազգային շահեր և վրաց ժողովրդի կողմից ընտրված իշխանության որոշումների նկատմամբ հարգանքիի անհրաժեշտություն։ «Եթե այսօր Բրյուսելում «առաջընթաց» ասելով հասկանում են, թե որքան անվերապահորեն է երկիրը կատարում քաղաքական պահանջները, ապա սա արդեն ոչ թե արժանիքների վրա հիմնված եվրոպական ինտեգրում է, այլ անվերապահ ենթարկվելու գնահատական»,- նշել է նա։