«Գիշերային հարձակման թիրախներից մեկը Ուկրաինայի էներգետիկ ենթակառուցվածքն էր»․ Զելենսկի

Ռուսական զորքերը զանգվածային հարվածներ են հասցրել Կիևի և Ուկրաինայի 12 մարզերի էներգետիկ ենթակառուցվածքներին ու բնակելի թաղամասերին։ Այս մասին հայտնել է Ուկրաինայի նախագահ Վլադիմիր Զելենսկին։ «Պուտինի ծննդյան օրվա կապակցությամբ ռուսական բանակը «նվեր» է մատուցել՝ Չեռնիգովի մարզի Պրիլուկի քաղաքում բնակելի շենք ոչնչացնելով։ Դա սովորական հինգհարկանի շենք էր։ Ցավոք, այս պահին հայտնի է հինգ զոհի և 26 վիրավորի մասին, այդ թվում՝ հինգ երեխայի։ Փլատակների տակ դեռ կարող են մարդիկ գտնվել»,- նշել է նա։

Նրա խոսքով՝ ռուսական հրթիռային հարվածների հետևանքով Դնեպրում ևս հինգ բազմաբնակարան շենք է վնասվել, իսկ Կրեմենչուգում՝ չորս բազմահարկ շենք։ Երկու մարդ զոհվել է, ութը՝ վիրավորվել։ Անօդաչու թռչող սարքի հարվածի հետևանքով Զապորոժիեում վնասվել է բազմահարկ շենք։ Կիևում ռուսական հարվածների հետևանքով երկու մարդ է զոհվել։ Եվս երկու մարդ զոհվել է Ալեքսանդրիայում։

Զելենսկին նշել է, որ ռուսական կողմը կիրառել է 70 հրթիռ, բազմաթիվ բալիստիկ հրթիռներ, ինչպես նաև «Շահեդ» անօդաչու թռչող սարքեր։ Նա կոչ է արել միջազգային գործընկերներին օպերատիվ կերպով տրամադրել լրացուցիչ «Patriot» հակաօդային պաշտպանության համակարգեր և դրանց համար նախատեսված հրթիռներ՝ բալիստիկ սպառնալիքներին դիմակայելու համար։