«Ինձ ապշեցնում է, որ մեր հանրությունը խաբվում է կեղծ թեզին». Տ. Հայրապետյան

ԱԺ նախկին պատգամավոր, ադրբեջանագետ Տաթևիկ Հայրապետյանը ֆեյսբուքյան իր էջում գրել է. «Ինձ ապշեցնում է, որ մեր հանրությունը խաբվում է այն կեղծ թեզին, թե Փաշինյանը հակառակվում է Մոսկվային կամ Մոսկվան ցանկանում է հեռացնել Փաշինյանին:
2018 թվականից հետո շատերն ասում էին, որ Մոսկվան հավան չի Փաշինյանին, ուզում է հեռացնել, հենց դրան էլ վերագրում էին 2020 թվականի պատերազմը: Պատերազմի արդյունքներով միայն մեծացավ ՌԴ-ի ազդեցությունը, ԼՂ-ն հայտնվեց աննախադեպ կախվածության մեջ ՌԴ-ից:
Բայց Փաշինյանին «չսիրող» Մոսկվան ակնհայտ աջակցեց Փաշինյանին 2021թ. ընտրությունների նախօրեին:
Ինչու, որովհետև դրանով կինոն դեռ չէր ավարտվել: Հետո Փաշինյանը կեղծ, թվացյալ հակամոսկովյան քայլեր է անում, իբրև կծում է ռուսներին, քննադատում խաղաղապահներին: ՌԴ-ն թույլատրում է նոր հարձակում Արցախի դեմ՝ մեղադրելով Փաշինյանին: Փաշինյանը վերջնական ձեռքերը լվանում է Արցախի թեմայից՝ մեր հայրենակիցներին թողնելով ծանր վիճակում:
Հենց նույն «հակառուս» Փաշինյանը ՄԱԿ-ի ԱԽ նիստից ժամեր առաջ ասում է, որ Արցախում չկա էթնիկ զտման վտանգ՝ դրանով արջի ծառայություն մատուցելով ՌԴ-ին ու իհարկե, նաև Ադրբեջանին ու Թուրքիային: Արդյունքում, միջազգայիններից որևէ ներգրավվածություն ակնկալելը դառնում է անիրատեսական, քանի որ երկրի ղեկավարն ասում է ամեն ինչ նորմալ է, մի խառնվեք: Սա էլ հերթական դրվագը Փաշինյանի «արևմտամետության» վերաբերյալ:
Հաջորդ արարը կբեմադրվի Սյունիքի շուրջ, դա Փաշինյանի գալիք տալիքն է: Դրա համար էլ մարգարիտասիմոնյանները, որոնց մեր երկրում տանել չեն կարում, ասում են գնացեք հրապարակ, որի հիման վրա նորմալ մարդիկ չեն ուզում դառնալ պրոռուսական գործիք՝ անգամ Փաշինյանի դեպքում: Ասպարեզ են նետվում այնպիսի դեմքեր, որոնք ընկալվում են որպես պրոռուսական, ուստի մարդիկ չեն ուզի գնալ նրանց հետևից: Արդյունքում, Փաշինյանի մի քիչ էլ կմնա:
Ամբողջը կրկնվում է նույն սցենարով՝ Փաշինյանի կողմից հակառուսական տեքստեր, պատերազմ, կորուստներ զիջում, որի հետևանքով ռուսների ոտքն ավելի է պնդանում մեր երկրում: Երբ էլ մարդիկ ուզում են ուշքի գալ ու հեռացնել Փաշինյանին, իշխանականները գոռում են՝ այ ռուսներին ե՞ք ուզում, դե չէ, իհարկե չէ, չէ՞ որ նրանք մեզ դավաճանել են: Ռուսների գլխավոր զենքը Հայաստանում ու Հայաստանի դեմ դա Փաշինյանն է, մնացածը խաղալիքներ են ընդամենը»: