#Amazon-ը բանակցում է #MetroGoldwynMayer-ի գնման շուրջ

Amazon ընկերությունը Metro-Goldwyn-Mayer կինոընկերությունը ձեռք բերելու բանակցություններ է վարում, հայտնում է Variety ամսագիրը՝ հղում անելով սեփական աղբյուրներին։
Հրապարակման համաձայն, արդեն մի քանի շաբաթ է, ինչ բանակցությունները շարունակվում են։ Գործարքի արժեքը կարող է կազմել մոտ 9 միլիարդ դոլար։
Նշվում է, որ գործարքը կազմակերպել են Amazon Studios-ի և Prime Video-ի փոխնախագահ Մայք Հոփքինսն ու MGM վարչության նախագահ Քևին Ուլրիխը:
Երկու ընկերությունների ներկայացուցիչները հրաժարվել են մեկնաբանել այդ տեղեկատվությունը։
2020 թվականի դեկտեմբերին MGM Holdings կինոընկերությունը հայտարարել էր, որ վաճառքի է հանում Metro-Goldwyn-Mayer կինոստուդիան: Այն ժամանակ փորձագետները կինոստուդիայի արժեքը գնահատում էին 5,5 միլիարդ դոլար։ Կինոստուդիայի վաճառքը վաղուց էր նախատեսվում, սակայն ընկերությունը չէր կարողանում գնի շուրջ համաձայնության գալ գնորդների հետ: