1956թ․ ի վեր առաջին անգամ չեղարկվել է Նոբելյան մրցանակաբաշխության հանդիսավոր ճաշկերույթը

Կորոնավիրուսի համավարակի պատճառով Նոբելյան մրցանակի հանդիսավոր ճաշկերույթը կչեղարկվի, այս մասին հաղորդել Է շվեդական Dagens Nyheter թերթը:
2020 թվականի Նոբելյան մրցանակի դափնեկիրները կհայտարարվեն, սակայն 1300 հյուրերի մասնակցությամբ ճաշկերույթը, որն անցկացվում է դեկտեմբերի 10-ին, չի կայանա:
«Երկու խնդիր կա. չենք կարող իրար մոտ հավաքել շատ մարդկանց։ Եվ պարզ չէ՝ արդյոք այդքան մարդ կկարողանա ժամանել Շվեդիա»,- ասել է Նոբելյան հիմնադրամի նախագահ Լարս Հեյքենշթենը։
Վերջին անգամ խնջույքը չեղյալ է հայտարարվել 1956 թվականին՝ Հունգարիայում Խորհրդային Միության ներխուժման դեմ բողոքի պատճառով։ Այն նաև չեղյալ է հայտարարվել Առաջին և Երկրորդ համաշխարհային պատերազմների ժամանակ։
Գիտության, գրականության և խաղաղության բնագավառում ձեռքբերումների համար մրցանակները հիմնվել և ֆինանսավորվել են շվեդ գյուտարար և գործարար Ալֆրեդ Նոբելի կտակի հիման վրա և շնորհվում են 1901 թվականից: