«Արդյո՞ք թափանցիկ է «Կրթության կառավարման տեղեկատվական համակարգը»». Ռուբեն Գրձելյան

«Հարավկովկասյան երկաթուղի» ընկերության մամուլի քարտուղար Ռուբեն Գրձելյանը ֆեյսբուքյան իր էջում գրել է. «Այս հաղորդագրությամբ ուզում եմ լրատվամիջոցների ուշադրությունը գրավել մի անհասկանալի ձևով գործող համակարգի վրա: Դա «Կրթության կառավարման տեղեկատվական համակարգն» է (https://emis.am/schools/index.php/auth): Բանը նրանում է, որ այս տարի ներդրվել է մի էլեկտրոնային համակարգ, որի միջոցով են երեխաները հաշվառվելու դպրոցներում և գնալու առաջին դասարան: Մայիսի 15-ի առավոտյան հեռախոսիս ստացա հաղորդագրություն, որ արդեն կարող եմ գրանցել երեխային: Քանի որ ապրում եմ Երևանի Ջոն Կիրակոսյանի անվան N20 (նախկին Ձերժինսկի) դպրոցի անմիջական հարևանությամբ և երկու մեծ երեխաներս հաճախում են այդ դպրոցը, ապա բնական է, որ երրորդին էլ պետք է ուղարկենք այդ դպրոց: Մայիսի 16 առավոտյան, այսինքն գրանցումի բացումից մեկ օր հետո, երբ հավաքեցի օնլայն դիմումի համար անհրաժեշտ տվյալները, համակարգը տեղեկացրեց, որ նշված կրթահամալիրում 100 տեղից բոլորն արդեն զբաղված են: Ընդ որում՝ 2018-ի ընդունելությունը 100 երեխայի չի հասնում: Այսինքն՝ ռեալ պահանջարկն այդ դպրոցի համար չի հասնում 100 առաջին դասարանցի: Եթե ենթադրենք, որ պահանջարկը 100 է, ապա ո՞նց կարող է ստացվել, որ 100% հայտերը ներկայացվեցին հենց 1 օրվա ընթացքում: Դիմումիս ի պատասխան «Կրթության կառավարման տեղեկատվական համակարգ»-ից հայտնեցին, որ՝ «Հարգելի Ռուբեն, ցավում եմ, որ տեղ չկա արդեն։ Բայց համակարգը գործարկվել է մայիսի 15-ի առավոտյան և այոʹ, շատ շուտ տեղերն սպառվել են։ Ասեմ, որ այս պահին 9519 երեխա արդեն գրանցել են։ Այս տարի առաջին դասարան գնացողների թիվը մոտ 13500 է կանխատեսվել։ Խնդրում եմ՝ ԶԼՄ ներկայացուցիչներին երկու հարց հղել Հայաստանի Հանրապետության կրթության և գիտության նախարարությանը՝

1. Արդյո՞ք թափանցիկ է «Կրթության կառավարման տեղեկատվական համակարգը», և նախարարությունը բացառում է, որ համակարգի միջոցով չեն կատարվում մեքենայություններ, երբ կենտրոնի որոշ դպրոցներոմ տեղերը պահուստավորվում են հետագայում «վաճառելու» նպատակով:
2. Արդյո՞ք Նուբարաշենում կամ 4-րդ գյուղում գրանցված և բնակվող երեխան նույն հնարավորությններն ունի ընդունվելու Ջոն Կիրակոսյանի անվան թիվ 20 հմ/դ կամ Ս.Շահմուրադյանի անվան թիվ 85 հմ/դ դպրոց այդ դպրոցների հարևանությամբ բնակվող երեխաների հետ: Եթե այոʹ, թող տրամաբանեն»: