«Չկան այն կապանքներն ու վախը, որ տիրում էր այն ժամանակ, երբ այստեղ նստած էր լինում Սերժ Սարգսյանը». Հովհաննես Հովհաննիսյան

ԵՊՀ Հոգաբարձուների խորհրդի անդամ Հովհաննես Հովհաննիսյանը ռեկտոր Արամ Սիմոնյանի լիազորությունների դադարեցման հարցի քննարկման ժամանակ ելույթ ունենալով՝ նշեց, որ իրեն հատկապես ուրախություն է պատճառում մեկ հանգամանք. «Այն մարդիկ, որոնք տարիներ շարունակ վախենում էին խոսել, երբ այստեղ նստած էր լինում Սերժ Սարգսյանը, այսօր հանգիստ արտահայտում են իրենց կարծիքը, չեն վախենում արտահայտվելուց: Այդ իմաստով, ինձ համար բավականին մեծ ուրախություն է դա, որովհետև այն կապանքները, որոնք նախկինում եղել են մարդկանց վրա, ուսանողների վրա, այսօր չկան: Եվ այդ տեսանկյունից բավականին հետաքրքիր են այն քննարկումները, երբ տարաբնույթ ձևակերպումներով մարդիկ խոսում են բուհական ինքնավարությունից: Ինձանից շատ թող որևէ մեկը կողմ չլինի բուհական ինքնավարությանը. ես այս ամիսներին ամեն ինչ արել եմ ի շահ Երևանի պետական համալսարանի»,- ասաց նա:

Հ. Հովհաննիսյանը նշեց, որ ստեղծված իրավիճակը որոշակի իմաստով, այսպես ասած, զոհ է նախորդ ռեժիմի:

Հիշեցնենք, որ այսօր Երևանի պետական համալսարանի հոգաբարձուների խորհրդի նիստում քննարկվում է ԵՊՀ ռեկտոր Արամ Սիմոնյանի լիազորությունների դադարեցման հարցը: