Երևան`   +13 °C
Այսօր`   Հինգշաբթի, 25 ապրիլի, 2019 թ.

Վենեսուելայում ընդդիմության առաջնորդն իրեն նախագահ է հռչակել. նրան աջակցել է Թրամփը

791
Հինգշաբթի, 24 հունվարի, 2019 թ., 12:00
Վենեսուելայում ընդդիմության առաջնորդն իրեն նախագահ է հռչակել. նրան աջակցել է Թրամփը

Վենեսուելայի Ազգային ասամբլեայի (խորհրդարան) ղեկավար Խուան Գուաիդոն իրեն հայտարարել է երկրի նախագահի ժամանակավոր պաշտոնակատար: ԱՄՆ նախագահ Դոնալդ Թրամփը հայտարարել է, որ նրան ճանաչում է որպես օրինական նախագահ, հաղորդում է BBC-ն:

Ելույթ ունենալով Կարակասում՝ բազմահազարանոց ամբոխի առջև, Գուաիդոն հայտարարել է, որ ստանձնում է նախագահի պարտականությունները, որպեսզի «վերջ դնի բռնի իշխանությանը, ձևավորի անցումային կառավարությունն ու ազնիվ ընտրություններ անցկացնի»:

ԱՄՆ նախագահ Դոնալդ Թրամփը հանդես է եկել հայտարարությամբ: «Վենեսուելայի ժողովուրդը հանդես եկավ Մադուրոյի և նրա ռեժիմի դեմ և ազատություն ու օրինականություն պահանջեց»,- պարբերականը մեջբերում է նրա խոսքը:

Պարբերականը նշում է, որ 35-ամյա Գուաիդոն հայտնի կերպար չէր Վենեսուելայի քաղաքականության մեջ, քանի դեռ չէր զբաղեցրել ընդդիմության վերահսկողության տակ գտնվող խորհրդարանի ղեկավարի պաշտոնը: Խորհրդարանում աշխատանքի ընթացքում Գուաիդոն Մադուրոյի վարչակազմի հետ կապված կոռուպցիոն մի շարք գործեր է բացահայտել: Գուաիդոն կրթությամբ ինժեներ է, ուսանողական տարիներին քաղաքական ակտիվիստ է եղել, ղեկավարել է Ուգո Չավեսի սոցիալիստական կառավարության դեմ ցույցերը:
«Հեռացեք Վենեսուելայից: Այստեղ մարդիկ արժանապատվություն ունեն»,- Reuters-ը մեջբերում է ներկայիս նախագահ Նիկոլաս Մադուրոյի՝ ամերիկացի դիվանագետներին ուղղված խոսքը: Մադուրոն նրանց 72 ժամ էր տվել երկրից հեռանալու համար: Բացի այդ, Մադուրոն հայտարարել է ԱՄՆ-ի հետ դիվանագիտական հարաբերությունների խզման մասին, սակայն ԱՄՆ Պետքարտուղարությունը չի ընդունել նրա հայտարարությունը: «Միացյալ Նահանգները չի կարծում, որ նախագահ Մադուրոն իրավասություններ ունի, որպեսզի խզի ԱՄՆ-ի հետ դիվանագիտական հարաբերությունները կամ մեր դիվանագետներին պերսոնա նոն գրատա հայտարարի»,- ասել է ԱՄՆ պետքարտուղար Մայք Փոմփեոն: