Երևանի թիվ 11 դպրոցի տնօրենի հրաժարականի դիմումը քաղաքապետարանում է. պաշտոնական

«Եթե տնօրենը սիրված չէ ուսուցիչների, աշակերտների կողմից, չպետք է աշխատի, բայց արդյոք չեք գտնո՞ւմ մեղավորություն ձեր մեջ, ինչո՞ւ եք լռել այս տարիների ընթացքում: Ինչո՞ւ էիք լռում, հարգելի մանկավարժներ, երբ ձեր իրավունքները ոտնահարվում էին»,- դիմելով Երևանի թիվ 11 դպրոցի դահլիճում հավաքված անձնակազմին՝ ասել է Երևանի քաղաքապետարանի աշխատակազմի հանրակրթության վարչության պետ Աննա Ստեփանյանը: Նա տեղեկացրել է, որ Ռուզան Ազիզյանը հրաժարականի դիմումը գրել է, ներկայացվել է քաղաքապետին, քաղաքապետը տվել է հանձնարարական՝ ընթացակարգը շարունակել: