«Նույնիսկ հազար դրամ ավելանալու դեպքում կան ծնողներ, որոնք հրաժարվելու են երեխային դպրոց տանել»․ Արայիկ Հարությունյանը՝ երաժշտական դպրոցներում վարձավճարի թանկացման մասին

«Երևանի քաղաքապետն օրակարգ է մտցրել Երևան քաղաքում տուրքերի փոփոխության նախագիծը։ Երեկ պատահականությամբ սկզբունքով զրուցել եմ երաժշտական ու արվեստի դպրոցների մի շարք տնօրենների հետ, վիճակը շատ ծանր է։ Այս թանկացումների պատճառով դպրոցների բյուջեները ոչ թե ավելանալու են, այլ, հնարավոր է, կրճատվեն, քանի որ մարզերից եկող սաների վարձերը թանկանալու են 2-5 անգամ։ Դպրոցներ կան, որտեղ մարզային գրանցում ունեցողների թիվը մեծ է։ Տնօրեններ կան, որոնք նշեցին, որ նույնիսկ հազար դրամի ավելանալու դեպքում կան ծնողներ, որոնք հրաժարվելու են երեխային տանել այդ դպրոցներ։ Երկու շաբաթ առաջ Երևանի փոխքաղաքապետ Վահե Նիկոյանին հարցրել էի՝ տնօրենները մտահոգություն հայտնել են, ռիսկեր տեսնում են, պատասխանը եղել էր բացասական։ Բայց պարզվում է՝ բողոքը մեծ է, բայց չեն բարձրաձայնում։ Չնայած տնօրեններին հայտնել եմ, որ իրենց անունները չեմ հրապարակելու, բայց առաջիկա երեք օրերին նրանց ու ծնողների հուժկու բողոքը կարող է օգնել տապալել այս նախագիծը։ Այն քննարկվելու է դեկտեմբերի 26-ին»,- գրել է Երևանի ավագանու կրթության, մշակույթի և սոցիալական հարցերի մշտական հանձնաժողովի նախագահ Արայիկ Հարությունյանը։

Նշենք, որ MAMUL.am-ը նույնպես ստացել է բազմաթիվ բողոքներ ծնողների կողմից, ովքեր իրենց դժգոհությունն են հայտնել քաղաքապետարանի այս որոշումից։ Նրանք գտնում են, որ սոցիալական այս սուղ իրավիճակում ուսման վարձ թանկացնելն արդարացի չէ։