«Սահմանադրության մեջ ԵՄ անդամակցության դրույթ ներառելով՝ ոչ մի քայլ չենք մոտենա Եվրոպային»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Նոր Սահմանադրության մեջ Եվրոպական Միության անդամակցությունը ամրագրելը նույնքան սխալ և մեր արտաքին քաղաքականությունը սահմանափակող դրույթ է, որքան 1990 թվականի Անկախության Հռչակագրում պահանջատիրություն և պատմական արդարություն դնելը:
Սահմանադրության մեջ ԵՄ անդամակցության դրույթ դնելով՝ մենք ոչ մի քայլ չենք մոտենա Եվրոպային, ճիշտ այնպես, ինչպես Անկախության Հռչակագրում 1989 թվականի դեկտեմբերի 1-ի միացման կետը դնելով չհասանք Լեռնային Ղարաբաղի՝ Հայաստանի հետ վերամիավորմանը:
Եթե այսօր արևելյան հարևանի պահանջով մենք Սահմանադրությունից հանում ենք Անկախության Հռչակագրին հղումը, ապա մի օր էլ մեկ այլ հարևանի պահանջով կարող ենք հանել ԵՄ-ի կետը:
Ես պարզ ասեմ. 1990 թվականի Անկախության Հռչակագրում պահանջատիրություն, Հայ դատ ու պատմական արդարություն դնելը եղել է կոպտագույն սխալ, որը, ցավոք, Լևոն Տեր-Պետրոսյանի նման սթափ մարդը չկարողացավ կանխել և տրվեց ազգայնական կամ այդպիսին համարվող շրջանակների սադրանքին:
Հիմա նույն կոպտագույն սխալն է արվում նոր Սահմանադրության մեջ:
Ինչու ենք սահմանափակում մեր մանևրելու հնարավորությունը, ինչու ենք Հայաստանի ապագա իշխանություններին դնում բարդ իրավիճակի մեջ:
Գրեթե քայլ չենք անում, որ իրականում մոտենանք Եվրոպային, եվրոպական արժեքները բերենք Հայաստան, դառնանք քաղաքակիրթ ազգ և պետություն, բայց ցուցադրական ու անիմաստ քայլերով գրգռում ենք հարևաններին ու Հայաստանի ապագա իշխանությունների համար ստեղծում թակարդներ»։