«Երկրի մթնոլորտում ջրային գոլորշու քանակը հասել է դիտարկումների ընթացքում գրանցված առավելագույնին»․ Լևոն Ազիզյան

«Հիդրոօդերևութաբանության և մոնիթորինգի կենտրոն» ՊՈԱԿ-ի տնօրեն Լևոն Ազիզյանի ֆեյսբուքյան գրառումը․ «Երկրի մթնոլորտում ջրային գոլորշու քանակը հասել է դիտարկումների ընթացքում գրանցված առավելագույնին
Օգոստոսին մթնոլորտում ջրային գոլորշու միջին պարունակությունը կազմել է 27,35 կգ՝ մակերևույթի յուրաքանչյուր քառակուսի մետրի հաշվով։ Սա ռեկորդային ցուցանիշ է Copernicus ERA5 տվյալների շարքում՝ 1979 թվականից ի վեր։ Նախորդ ռեկորդը գերազանցվել է ընդամենը 0,04 կգ/մ²-ով, սակայն ամբողջ մոլորակի մասշտաբով դա համարժեք է շուրջ 20 տրիլիոն լիտր հավելյալ ջրի։
Copernicus-ն այս ցուցանիշը կապում է օդի ռեկորդային ջերմաստիճանի, արևադարձային գոտու օվկիանոսների շատ տաք ջրերի և ուժգնացող Էլ Նինյոյի հետ։
Սա չի նշանակում, որ այդ ամբողջ ջուրն անպայման անձրևի տեսքով կտեղա։ Սակայն ավելի խոնավ մթնոլորտը մեծացնում է հորդառատ տեղումների, գիշերային տոթի և ուժեղ ցիկլոնների զարգացման ներուժը։ Խտացման ժամանակ ջրային գոլորշին անջատում է ջերմություն՝ լրացուցիչ էներգիա հաղորդելով փոթորկային համակարգերին»։