Գիտնականները մալարիայի բուժման նոր մոտեցում են գտել

Մալարիայի մակաբույծի վերարտադրությունը կարելի է կասեցնել՝ փոխելով տիրոջ օրգանիզմի ջերմաստիճանը, ինչը կարող է օգնել հիվանդության բուժմանը, «ՌԻԱ Նովոստի»-ին ասել է Տոկիոյի Ջիկեյ բժշկական համալսարանի արևադարձային բժշկության ամբիոնի դոցենտ Թայչի Օդագավան։

«Մեր հետազոտությունը պարզել է, որ երբ մալարիայի մակաբույծը տեղադրվում է մարմնի նորմալ ջերմաստիճանից ցածր ջերմաստիճանային միջավայրում, նրա բազմացումը ճնշվում է», - ասել է փորձագետը։

Հետազոտությունն իրականացվել է արևադարձային մալարիայի մշակված հարուցչի, ինչպես նաև մկան մոդելի վրա։ Երկու դեպքում էլ, ըստ գիտնականի, երբ ջերմաստիճանը իջել է, մակաբույծի վերարտադրությունը ճնշվել է։

«Պատճառներից մեկը կարող է լինել այն, որ մալարիայի մակաբույծի՝ նոր կարմիր արյան բջիջներ ներթափանցելու գործընթացը խաթարվում է։ Մալարիայի մակաբույծը բազմանում է կարմիր արյան բջիջների ներսում, ապա պարբերաբար դուրս է գալիս դրանցից և մտնում հաջորդ կարմիր արյան բջիջներ՝ այդպիսով ավելացնելով իր քանակը», - բացատրել է Օդագավան։

«Այնուամենայնիվ, այս ուսումնասիրության արդյունքները չեն նշանակում, որ ջերմության բռնի իջեցումը կարող է բուժել մալարիան։ Մալարիայի բուժման հիմնական սկզբունքը մալարիայի դեմ դեղամիջոցների ճիշտ օգտագործումն է», - ընդգծել է նա։

Օդագավան հավելել է, որ հիվանդների մոտ հիպոթերմիայի կամ մարմնի ջերմաստիճանի կարգավորման կիրառումը կպահանջի կենդանիների վրա հետագա փորձարկումներ, անվտանգության գնահատումներ և կլինիկական փորձարկումներ: Նա բացատրել է, որ եթե այս մոտեցումը կիրառվի, հիվանդները պետք է ենթարկվեն ոչ միայն մարմնի ջերմաստիճանի, այլև արյան ճնշման, զարկերակի, շնչառության, գիտակցության վիճակի և օրգանների ֆունկցիայի խիստ մոնիթորինգի: