«Որոշում ենք կայացնելու՝ ելնելով նրանից, թե այն որքան արդյունավետ է լինելու ՀՀ գործող կառավարիչների դեմ պայքարում»․ Սերժ Սարգսյան

«Ես զարմանում եմ այն մարդկանց վրա, որոնք մշտապես փորձել են, հիմա էլ են փորձում իմփիչմենթը հակադրել ընտրություններին»,- այսօր դատական նիստից հետո լրագրողների հետ զրույցում ասաց ՀՀ երրորդ նախագահ Սերժ Սարգսյանը՝ մեկնաբանելով լրագրողի հարցը, թե՝ «Քաղաքական օրակարգում մի մասն իրատեսական է գնահատում իմփիչմենթի գործընթացը, նույնիսկ կոչ են անում անհապաղ համախմբվել գործընթացի շուրջ, մյուս մասն էլ ասում է՝ ընտրություններից առաջ ինչ իմփիչմենթ»։
«Տաս անգամ ասել ենք, հիմա տասնմեկերորդ անգամ ասենք՝ անկախ որևէ հանգամանիքից, իմփիչմենթ լինի թե չլինի, ընտրություններ լինելու են: Դրանք հերթական ընտրություններ են, որ կարող են հետաձգվել միայն ու միայն եզակի դեպքերում: Մեր որոշումը, մեր հայտարարությունը միասնության մասին է: Մենք ասում ենք, որ իմփիչմենթը նաև ճգնաժամ հանգուցալուծելու գործիք է, եկեք փորձենք: Եթե ասում են՝ չի լինի, հիմա ինչ փորձենք և այլն, իրենք, ամենայն հավանականությամբ, նմանվում են այսօրվա ՀՀ կառավարիչներին, ովքեր ասում են՝ դե մենք թույլ ենք, Ադրբեջանն ինչ ուզում է՝ տանք։ Չեն ուզում՝ չեն ուզում, մենք մեր ուժերի սահմանում կփորձենք իրականացնել»,- նշել է նա:

Խոսելով գալիք ընտրություններին ՀՀԿ-ի մասնակցության մասին՝ Սերժ Սարգսյանն ասել է. «Եթե խոսքը գնում է մեր ընտրություններին մասնակցելու մասին, ապա մենք որոշում ենք կայացնելու ելնելով նրանից, թե մեր կայացրած որոշումը որքան արդյունավետ է լինելու Հայաստանի գործող կառավարիչների դեմ պայքարում»: