«Դուք լավ փաստաթուղթ չեք բանակցել ու չէիք էլ կարող բանակցել»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Հայաստանը չկարողացավ հասնել իր պատկերացրած ու իր երազած խաղաղությանը, այն է՝ Արցախը պահում ենք հայկական, Արցախը չի լինում Ադրբեջանի կազմում (այս միտքը թարգմանության կարիք ունի, բայց այլ առիթով), վեցուկես շրջանները վերադարձնում ենք, կոմունիկացիաները բացվում են, շրջափակումները՝ վերացվում:
Ազգովին ֆիդայի դառնալու, ավելի ճիշտ՝ իբր դառնալու ժողովուրդը և պետությունը ամբողջությամբ ստիպված է եղել վերադառնալու status quo ante, այն է՝ խորհրդային սահմաններ, ավելի՝ ցավալի պարտություն, Արցախի ամբողջական հայաթափում, զավթված տարածքներ... Բաքվում թեյ խմող ժողովուրդը հերթի տակ ադրբեջանական բենզին է գնում Երևանում և բացարձակապես դիսկոմֆորտ չի զգում: Ավելին, քարոզչական մասը հենց մեր կառավարությունն է ապահովում:
Ադրբեջանը, եթե վերադառնանք խորհրդային բառապաշար՝ широко шагает Азербайджан, ստացել է շատ շատ ավելին, քան կարող էր երազել:
Այն, ինչ այսօր տեղի է ունենում, պարտության փաստաթղթավորումն է խաղաղության հաստատման անունով: Դա խաղաղության պարտադրում է:
Ավելի վատն ու սարսափելին էլ կարող էր լինել, այնպես որ՝ սա չարյաց փոքրագույնն է: Չէ, պարոն Միրզոյան, Դուք լավ փաստաթուղթ չեք բանակցել ու չէիք էլ կարող բանակցել, քանի որ ձեր տակ յոթ շրջան չկար: Դուք, Ձեր թիմն ու Ձեր նախորդները մսխեցին ամեն բան: Դուք ստացել եք այն, ինչ կարող էինք ստանալ՝ պլյուս-մինուս: Բայց պետք չէ պարտադրանքը սեփական ժողովրդին վաճառել որպես դիվանագիտական նվաճում և ինքնագոհ տեքստեր գրել:
Անձամբ դեմ չեմ անգամ այս պարտադրված խաղաղությանը, որովհետև այդպես պիտի լիներ և այս պայմաններում այլընտրանք չունենք:
Լավ եղեք»: