«Քաղաքացիները շատ լավ հասկանում են՝ ով է իրական սպառնալիքը ՀՀ-ի համար»․ Բենիամին Մաթևոսյան

Քաղաքագետ Բենիամին Մաթևոսյանը ֆեյսբուքյան իր էջում տեսանյութ է հրապարակել՝ կից գրառմամբ. «Անվտանգային առումով այլընտրանք այդպես էլ չեն առաջարկել: Ընկերներ, տարին ավարտվում է, և կարելի էր, իհարկե, ամփոփել միայն 2025 թվականը, բայց եկեք ամփոփենք իրողությունները 2018 թվականից սկսած, և այստեղ մեզ կօգնեն սոցիոլոգիական հարցումները:
Եթե մինչև 2018-ի հայտնի իրադարձությունները քաղաքացիներին հուզող հիմնական խնդիրը սոցիալ-տնտեսական բնույթի հարցերն էին, և մարդիկ շատ արդարացիորեն 2018 թվականին դուրս եկան փողոց՝ պայքարելու համար իրենց տնտեսական խնդիրները լուծելու համար, ապա 2020-ից 2023 թվականից հետո թիվ մեկ խնդիրը դարձել է անվտանգությունը: Ըստ թարմ հարցման տվյալների՝ քաղաքացիների ավելի քան 37%-ը կարծում է, որ Հայաստանի թիվ մեկ խնդիրը դա անվտանգությունն է:
Եթե մենք մի փոքր ետ գնանք և 2024 թվականի հարցման արդյունքներն ուսումնասիրենք, մենք կտեսնենք, որ քաղաքացիների ճնշող մեծամասնությունը՝ ավելի քան 80%-ը, Հայաստանի համար թիվ մեկ սպառնալիք տեսնում են Թուրքիան և Ադրբեջանը: Այս իրողությունները երբ որ համադրում ես, հասկանում ես հետևյալը. Ա. Քաղաքացիները շատ լավ հասկանում են՝ ով է իրական սպառնալիքը Հայաստանի Հանրապետության համար, և Բ. Անկախ քարոզչական փոշուց՝ քաղաքացիները հասկանում են, որ անվտանգային առումով այլընտրանք Հայաստանին այդպես էլ չի առաջարկվել:
Այլընտրանք ինչի՞ն: ՀԱՊԿ-ին անդամակցությանը, այլընտրանք Ռուսաստանի Դաշնության հետ ռազմաքաղաքական դաշնակցային հարաբերություններին: Իրենք էլ են դա հասկանում, այդ պատճառով ՀԱՊԿ-ից ոչ թե դուրս են գալիս, այլ սառեցնում են անդամակցությունը՝ շատ լավ իմանալով, որ եթե դուրս գան առանց անվտանգային երաշխիքների, ապա մենք կարող ենք մի քանի օրում հայտնվել սիրիական կարգավիճակում»։