«Ի՞նչ «նստվածք» կարող է թողնել այս որոշումը հանրային տարբեր շրջանակների մտորումներում»․ Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը. «Սամվել Կարապետյանի փաստաբանը հայտնել է, որ դատարանը մասնակի բավարարել է միջնորդությունն ու փոխել Կարապետյանի խափանման միջոցը՝ տնային կալանք և գրավ: Սամվել Կարապետյանը Նոր տարին կդիմավորի տանը, հարազատների հետ:

Անխոս ողջունելի է, երբ ցանկացած մարդ, առավել ևս հանիրավի հետապնդվող, Նոր տարին ի վերջո դիմավորում է ոչ թե կալանատանը, այլ՝ տանը, հարազատների շրջանում, թեկուզ տնային կալանքի ռեժիմում:

Բայց, այս իրավիճակը մարդկային ասպեկտից զատ, իհարկե քաղաքական է, եթե չասենք՝ առաջին հերթին քաղաքական, հաշվի առնելով, որ հենց այդ մոտիվով է Կարապետյանը հետապնդվել ու հայտնվել բանտում: Եվ նա միակը չէ, որ հետապնդվում է այդ մոտիվով:

Եվ ահա, ի՞նչ է ստացվում: Ստացվում է, որ Կարապետյանը Նոր տարին դիմավորելու է տանը, իսկ ահա մնացյալ հետապնդվողների մեծ մասը, այդ թվում և առավել հանրահռչակ մարդիկ, շարունակելու են մնալ բանտում՝ ինչպես օրինակ կալանավորված Սրբազանները, Մասիսի ՀՀԿ-ական համայնքապետը, արդեն կարծես թե նաև «Հայրենիք» կուսակցությունից Խաչիկ Գալստյանը, որին ձերբակալել են նախօրեին:

Հավատացնում եմ, որ այսպիսի մանրուքները երբեք չեն վրիպում հասարակության առնվազն մի մասի աչքից, և հետևաբար՝ մարդկային իմաստով ողջունելով, որ Կարապետյանը կլինի տանը, ոչ թե բանտում, քաղաքական իմաստով այդուհանդերձ առնվազն հարց է առաջանում, թե նրան անհիմն ձերբակալած ու ամիսներ շարունակ կալանքի տակ պահող իշխանությունն ինչո՞ւ հանկարծ որոշեց Նոր տարվա շեմին փոխել խափանման միջոցը:

Համենայն դեպս, կարծում եմ այս պատկերի, այսպես ասած, քաղաքական նստվածքի մասին Սամվել Կարապետյանն ու «Մեր ձևով» շարժումը պետք է մտածեն:

Ներեցեք, բայց ասել, թե սա փաստաբանական թիմի հաղթանակ էր կամ արդարադատության հաղթանակ, կհնչի անլուրջ: Անկասկած է, որ՝ ինչպես քաղաքական որոշումով եղել է հետապնդումն ու կալանավորումը, այնպես էլ քաղաքական որոշումով լինելու է խափանման միջոցի փոփոխությունը: Հետևաբար պետք է հասկանալ, թե ինչո՞ւ այդպիսի որոշում, ինչո՞ւ Նոր տարվա շեմին, և ի՞նչ «նստվածք» կարող է թողնել դա հանրային տարբեր շրջանակների մտորումներում:

Սրանք էական հարցեր են, որ առաջին հերթին պետք է հուզեն քաղաքական հայտ ներկայացրած Սամվել Կարապետյանին»։