«ԱՄՆ-ն առաջին անգամ պատրաստակամություն է հայտնել զորքեր ուղարկել Ուկրաինա». Տուսկ

Լեհաստանի վարչապետ Դոնալդ Տուսկը հայտարարել է, որ Միացյալ Նահանգներն առաջին անգամ հրապարակավ հայտնել է իր պատրաստակամությունը՝ մասնակցելու Ուկրաինայի անվտանգության երաշխիքների տրամադրմանը՝ խաղաղության համաձայնագրի հնարավոր կնքումից հետո։

Նրա խոսքով՝ հայտարարությունը հնչել է եվրոպական հիմնական երկրների ղեկավարների, Կանադայի վարչապետ Մարկ Քարնիի, եվրոպական հաստատությունների ղեկավարների և ՆԱՏՕ-ի գլխավոր քարտուղար Մարկ Ռյութեի հետ բարձր մակարդակի բանակցություններից հետո։ Տուսկը նշել է, որ խաղաղության հեռանկարը «շատ մոտ է» և կարող է իրականանալ առաջիկա շաբաթներին, այլ ոչ թե ամիսներին կամ տարիներին։

Լեհաստանի վարչապետը՝ որպես այս լավատեսության հիմք, նշել է Վաշինգթոնից ստացված առաջին հստակ ազդանշանները։ Սա վերաբերում է Միացյալ Նահանգների պատրաստակամությանը՝ մասնակցելու Ուկրաինայի անվտանգության երաշխավորմանը, այդ թվում՝ ամերիկյան զորքերի հնարավոր ներկայությանը, օրինակ, Ուկրաինայի և Ռուսաստանի միջև սահմանին կամ շփման գծում, խաղաղության համաձայնագրի ձեռքբերումից հետո։

Տուսկը ընդգծել է, որ սա առաջին անգամն է, որ Միացյալ Նահանգներն արտահայտում է իր զորքերն Ուկրաինայում տեղակայելու հնարավորության մասին՝ որպես անվտանգության երաշխիքների համակարգի մաս։