«Ամրոցի բանալիները հանձնող հուդաներից յուրաքանչյուրը մտքում կաթողիկոս դառանալու տենչանք ունի»․ Սուրեն Սուրենյանց

«Պատեհ չէր ընդդիմության ոգևորությունը նրանից, որ Փաշինյանի մասնակցությամբ ոչ կանոնիկ պատարագները սակավամարդ էին։ Հասկանալի էր, որ Փաշինյանը շեշտը դրել էր հակաեկեղեցական կամպանիայի ընդլայնման վրա, և «մասովկան» երկրորդական-երրորդական դեր ուներ»,- այս մասին «Եվրոմեդիա»-ի հետ զրույցում նշեց քաղաքագետ Սուրեն Սուրենյանցը՝ ընդգծելով, որ Փաշինյանը շեշտը դրել է երկու մարտավարական խնդրի վրա՝ պառակտում առաջացնել հոգևոր վերնախավում և գործի դնել ռեպրեսիաների մեքենան։

Անդրադառնալով Եկեղեցու «մաքրագործման մղումով» առաջնորդվող եպիսկոպոսների քայլին՝ նրանց ստորագրությամբ հրապարակված հայտարարությանը՝ Սուրենյանցը նշեց․ «Չեկիստական ձեռագրի հետ գործ ունենք, չգիտեմ՝ ում վրա ինչ ճնշում է բանեցվել, որ 9 թշվառներ ստորագրել են այդ փաստաթղթի տակ»։
Սուրենյանցի խոսքով՝ Վեհափառը պիտի խիզախի և գնա բարեփոխումների, և այնպիսի ստատուս քվո պետք է ստեղծվի, որը գուցե նաև իր կողմից է անձնական ինքնազոհություն պահանջելու։

«Մենք 2 խնդիր ունենք՝ մի կողմից՝ պիտի կանխենք Նիկոլ Փաշինյանի հակասահմանադրական միջամտությունը Եկեղեցու գործերին, և դրանից հետո Եկեղեցու ներսում առկա խնդիրների մասին պետք է լրջորեն մտածել»,- հավելեց քաղաքագետը։

«Արդեն ունենալով ամրոցի բանալիները հանձնողներ՝ Փաշինյանը կա՛մ կգնա ուժային գրոհի՝ ռեպրեսիվ մեթոդով Կաթողիկոսին կհեռացնեն․ նենգադավ և ուխտադրուժ հոգևորականները սպասում են այդ պատեհությանը, այդ հուդաներից յուրաքանչյուրը մտքում կաթողիկոս դառանալու տենչանք ունի։ Կա՛մ էլ կգնա մաշեցման ճանապարհով՝ պառակտումը կխորացնի, գուցե հոգևոր ճամբարներն իրար դեմ հանի, և անընդհատ սկանդալներ կլինեն Եկեղեցու ներսում»,- ընդգծեց Սուրենյանցը։