«Զանգեզուրի միջանցքի բացումը կարևոր դեր կխաղա անխոչընդոտ հաղորդակցության հաստատման գործում»․ Ալիև

«Զանգեզուրի միջանցքի» բացումը էական դեր կխաղա մեր երկրների միջև ուղիղ և անարգել կապերի հաստատման գործում։ Ինչպես հաղորդում են ադրբեջանական լրատվամիջոցները, այս մասին ասվում է Ադրբեջանի նախագահ Իլհամ Ալիևի՝ «Հատուկ ծառայությունների դերը միջազգային տրանսպորտային ուղիների անվտանգության ապահովման գործում» խորագրով միջազգային համաժողովի մասնակիցներին ուղղված ուղերձում։

Ալիևի խոսքով նախագծի իրականացումը կմեծացնի բեռնափոխադրումների ծավալը և կբարձրացնի տարածաշրջանի մրցունակությունը։ «Սակայն մեր տրանսպորտային հանգույցների աճող դերը դրանք դարձնում է ապակառուցողական ուժերի թիրախ։ Մեր տրանսպորտային և կապի գծերը խոցելի են միջազգային ահաբեկչության, միջազգային կազմակերպված հանցավորության, թմրանյութերի ապօրինի շրջանառության, մաքսանենգության և կիբերսպառնալիքների նկատմամբ, որոնք ուղղված են կարևորագույն տրանսպորտային ենթակառուցվածքների կառավարման համակարգերի կաթվածահար անելուն»,- նշել է Ալիևը։