Չինաստանը քաղծառայողներին արգելում է արտասահման մեկնել

Չինական իշխանություններն ավելի ու ավելի են սահմանափակում պետական ծառայողների և օտարերկրացիների միջև ցանկացած հնարավոր շփում, գրում է The New York Times (NYT)-ը: Իշխանությունները ոչ միայն արգելում են արտասահման մեկնելը, այլև «բռնագրավում են» «պետական հատվածի աշխատողների» անձնագրերը:
Ինչպես հաղորդում է թերթը, շատ քաղաքներում պետական ծառայողներին թույլտվություն է անհրաժեշտ արտասահման մեկնելու համար նույնիսկ անձնական պատճառներով: Արգելվում են «սովորական հետազոտությունների, փորձի փոխանակման և ուսման» համար արտասահման գործուղումները: Եվ նահանգների մեծ մասում արտասահմանում սովորածներին այժմ արգելվում է զբաղեցնել որոշակի պետական պաշտոններ:

Արգելքը վերաբերում է բոլոր պետական ծառայողներին, այդ թվում՝ դպրոցների և մանկապարտեզների ուսուցիչներին, բժիշկներին և պետական ընկերությունների շարքային աշխատակիցներին, ովքեր հասանելիություն չունեն պետական գաղտնիքներին կամ որևէ այլ գաղտնի տեղեկատվության: Ավելին, որոշ քաղաքների իշխանությունները պետական ծառայողների անձնագրերը չեն վերադարձնում նույնիսկ նրանց թոշակի անցնելուց հետո:

Ինչպես նշում է NYT-ը, բարձրաստիճան պաշտոնյաների՝ արտասահման մեկնելու արգելքը Չինաստանում գործում է ավելի քան 20 տարի: Սակայն Սի Ցզինպինի օրոք վերահսկողությունը տարածվել է շատ ավելի ցածր մակարդակի պետական ծառայողների վրա: Թերթի տվյալներով՝ կանոններն իրենք կենտրոնական կառավարության փորձ են՝ ամրապնդելու քաղաքական կարգապահությունը և գաղափարական հավատարմությունը պետական ծառայողների շրջանում։

Թերթի հետ զրուցած անձինք ասել են, որ իրենց նաև հրահանգվել է իրենց գործատուներին հասանելիություն տալ իրենց անձնական սոցիալական ցանցերի հաշիվներին։ Մեկ այլ անձ ասել է, որ ինքը ստիպված է եղել տեղեկացնել իր գործատուին, երբ լքում է իր աշխատավայրը։ Իսկ որոշ տեղական ինքնակառավարման մարմիններ արգելել են պետական ծառայողներին ճաշի համար հավաքվել երեքից ավելի անձանցից բաղկացած խմբերով։