«Ընդդիմադիր պատգամավորները չեն առաջնորդվում ձեր նեղսրտության աստիճանով»․ Արթուր Սուքոյանը՝ Էդգար Ղազարյանին

Պատգամավոր Լևոն Քոչարյանի օգնական Արթուր Սուքոյանի ֆեյսբուքյան գրառումը․ «Էդգար Ղազարյանը, ըստ ամենայնի, իրապես կարծում է, թե երբ գլխավոր դատախազը ԱԺ է ներկայացնում 3 պատգամավորի անձեռնմխելիությունից զրկելու, իսկ մեկի նկատմամբ՝ կալանավորման հարցը, բոլորը պետք է թողնեն այդ ամենը և հարց բարձրացնեն՝ ինչո՞ւ է մի պատգամավոր հրաժարվել հանդիպել Էդգար Ղազարյանի հետ, և ինչո՞ւ դրանով քրեական վարույթ չի նախաձեռնվել։
Հարգելի Էդգար, ընդդիմադիր պատգամավորները չեն առաջնորդվում ձեր նեղսրտության աստիճանով։ Այս պահին խոսքը ձեր շուրջ պտտվող աշխարհից չէ, այլ՝ շատ կոնկրետ քաղաքական հետապնդման վտանգի մեջ գտնվող պատգամավորների մասին է։ Վստահ եղեք՝ անհրաժեշտության դեպքում՝ եթե ձեր նկատմամբ իսկապես անօրինականություն է տեղի ունեցել, առիթ կլինի հնարավոր համարժեք արձագանքելու դատախազի մոտ։
Բայց հիմա, երբ մարդիկ փորձում են պաշտպանվել հավանական ազատազրկումից, սեղմ ժամկետներում՝ հանրային ուշադրության կենտրոնում, ձեր անձի հետ կապված ներանձնական դրամաները, ներողություն, որևէ մեկին չեն հետաքրքրում։ Իհարկե, եթե հանդիպման մերժումից հետո ծանր մարմնական վնասվածքներ չեք ստացել կամ կոմայի մեջ չեք ընկել, օրինակ։
Իսկ աշխարհը՝ չնայած ձեր ֆեյսբուքյան և յութուբյան ակտիվությանը, ձեր շուրջ չի պտտվում։ Դա ֆեյսբուքյան ու յութուբյան թվացյալ իրականությունն է, որը ձեր անունը, խոսքը կամ դեմքը հաճախ երևալու արդյունքում ձեզ թվացել է, թե դուք թվային մոլորակի կենտրոնն եք։ Բայց մի շփոթեք վիրտուալ հիպերակտիվությունն իրական քաղաքական կյանքի հետ, և մի պահ բացի հայելու մեջ նայելուց՝ ուշադրություն դարձրեք հայելուց դուրս կատարվողին»։
Էդգար Ղազարյանը գրել էր․ «Ազգային ժողովի պատգամավորներից ոչ ոք հարց չի ուղղում ՀՀ գլխավոր դատախազ Աննա Վարդապետյանին, թե նա ինչու հանրային քրեական վարույթ չի նախաձեռնում Ազգային ժողովի «Քաղաքացիական պայմանագիր» խմբակցության այն պատգամավորների դեմ, ովքեր իմ հանդեպ ցուցաբերել են ՀՀ քրեական օրենսգրքով նախատեսված խտրականություն՝ Ազգային ժողովում քաղաքացիների ընդունելության ժամանակ։ Բոլոր դեպքերով ներկայացվել է հաղորդում հանցագործության մասին»։