«Ուկրաինայի պատերազմը ԽՍՀՄ-2-ի մասին է». Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Արցախում մեր պարտությունների և հայաթափման մեջ ես առաջին հերթին մեզ եմ մեղադրում: Անշուշտ, կարող ենք մեր այս և բոլոր մյուս պարտությունները մեջ միայն ուրիշներին մեղադրել:
Սրա հետ մեկտեղ միշտ մտածում եմ, թե ինչու Ռուսաստանը Արցախի հարցում Թուրքիայի հետ կանգնեց Ադրբեջանի կողքին:
Նիկոլի հակառուս և արևմտամետ լինելու պնդումը ծաղր է ռուսական կայսրության հասցեին: Ռուսաստանը և մյուս կայսրությունները իրենց շահերը մեկ անձով չեն պայմանավորում, հատկապես երբ կարող են այդ անձին կես ժամում հեռացնել իշխանությունից:
Ինձ թվում է, որ նախագահ Պուտինի և Ռուսաստանի այսօրվա էլիտայի մոտ կա այն ընկալումը, որ Խորհրդային Միության փլուզման պատճառն ու մեղավորը Արցախն է և Ղարաբաղյան շարժումը:
Կարող է իմ այս ընկալումը մանկամիտ հնչել, բայց ես այդպես եմ կարծում: Ավելին, եթե Պուտինը որոշել է ԽՍՀՄ-2 ստեղծել, ապա միութենական հանրապետությունների շարքում առաջիններից մեկին տեսնում է Հայաստանը:
Ռուսական էլիտան ԽՍՀՄ փլուզումը շարունակում է համարել աշխարհաքաղաքական աղետ: Այլ մարդիկ մտածում են, որ ԽՍՀՄ ստեղծումն էր աշխարհաքաղաքական աղետը:
ԱՊՀ գագաթաժողովներում, հիշում եմ, Ղազախստանի նախագահ Նուրսուլթան Նազարբաևը անդադար կրկնում էր՝ «Ում սիրտը չի ցավում ԽՍՀՄ փլուզման համար, նա խիղճ չունի, ով մտածում է, որ հնարավոր է վերականգնել ԽՍՀՄ-ը, նա խելք չունի»:
Ուկրաինայի պատերազմը, իմ կարծիքով, ԽՍՀՄ-2-ի մասին է:
Եւ վերջում՝ երեկվա Սումիի հրթիռակոծությունը նողկալի, սարսաելի ու դատապարտելի էր, մանավանդ Սուրբ Ծաղկազարդի օրով»: