Իսրայելցի 6 ողջ և 4 մահացած պատանդ կփոխանակվեն պաղեստինցի ավելի քան 600 բանտարկյալի հետ. The Times of Israel

Իսրայելի վարչապետ Բենիամին Նեթանյահուի գրասենյակը երեքշաբթի հաստատել է, որ շաբաթ օրը 6 իսրայելցի պատանդ ազատ կարձակվի՝ որպես պաղեստինյան ՀԱՄԱՍ խմբավորման հետ գործարքի առաջին փուլի մաս:

«Եթե Կահիրեի համաձայնագիրը կյանքի կոչվի, դա մեծ ձեռքբերում կլինի Իսրայելի համար»,- մեջբերում է The Times of Israel-ն իսրայելցի անանուն պաշտոնյայի խոսքերը։

Աղբյուրը նշել է, որ 6 պատանդների ազատ արձակումը Կահիրեում ընթացող բանակցությունների արդյունք է։

Իսրայելի ՆԳՆ-ն նաև հայտնել է, որ 4 զոհված պատանդի մարմին հինգշաբթի օրը կհանձնվի Իսրայելին:

Միևնույն ժամանակ, Պաղեստինի ինքնավարության գերիների գրասենյակը հայտնում է, որ այս շաբաթ, որպես «գերիների փոխանակման» հաջորդ փուլի մաս՝ Իսրայելի իշխանությունները պետք է ազատ արձակեն ահաբեկչության համար դատապարտված կամ ահաբեկչության կասկածանքով կալանավորված 602 բանտարկյալի։ Հաղորդվում է, որ ցուցակում ընդգրկված են 157 դատապարտված զինյալ և Գազայի 445 բնակիչ, որոնք կալանավորվել են 2023 թվականի հոկտեմբերի 7-ից հետո: Ազատ արձակվածներից 50-ն Իսրայելի կողմից դատապարտվել են ցմահ ազատազրկման, ևս 60-ը՝ երկարաժամկետ ազատազրկման։