«Ի հիշատակ մեր նահատակների՝ շաբաթներով միայն ջուր եմ խմել». Նիկոլ Փաշինյան

«Ես այդպիսի բա՞ն եմ ասել»,- ի պատասխան լրագրողի հարցին՝ ասաց Նիկոլ Փաշինյանը։ Նա չհիշեց, որ Արագածոտնի մարզում, նախընտրական քարոզարշավի ժամանակ խոսելով Քոչարյանի աջակիցների մասին, ասել է՝ «դրանց սաղին բռնելու եմ շինեմ»։ «Այս ընթացքում ո՞ւմ եք շինել։ Ձեր ուժը մենակ մեր վրա է պատո՞ւմ․ Ալիևին ե՞րբ եք շինելու։ Խոհանոցից ե՞րբ եք դուրս գալում անցնելու Շուշիի և Հադրութի դեօկուպացիային, դուք դրա համար եք մանդատ ստացել»,- հարցրեց լրագրողը։ «Ես հենց տենց եմ ասե՞լ, այդ բառապաշարո՞վ, չեմ հիշում։ Մեկնաբանության հարց ա՝ ինչ եմ նկատի ունեցել, դուք ինչ ի նկատի ունեք»,- ասաց Փաշինյանը՝ անդրադառնալով «խոհանոցից դուրս եկեք» արտահայտությանը․ «Աշխարհի բոլոր առաջնորդները սնվում են, ձվածեղ են ուտում։ Ամենատարբեր առիթներով փորձ է արվում ներկայացնել, թե վարչապետն ու իր ընտանիքը դադարել են սովորական սնունդ օգտագործել»,- ասաց Փաշինյանը։ Ըստ նրա, այդ նպատակով է նաև հրապարակել ձվածեղ պատրաստելու տեսանյութը․

«Ժողովուրդ, աշխարհի բոլոր առաջներդները հաց ուտում են՝ անկախ նրանից, թե ինչ բարդ իրադարձություններ են երկրում։ Ինտիմ մանրամասն եմ բացահայտում, եղել է, որ շաբաթով հաց չեմ կերել։ Օրինակ 2020թ. նոյեմբերին մի շաբաթ միայն ջուր եմ օգտագործել, 2021թ․ նոյեմբերին էլ, ի հիշատակ մեր նահատակների, մի շաբաթ բացի ջրից այլ բան չեմ ընդունել»,- ասել է նա։