«Թշնամու բանակում կոռուպցիան ահռելի չափերի է հասել»․ Կարեն Հովհաննիսյան
73
Երեկ, 18:06
Ռազմական փորձագետ Կարեն Հովհաննիսյանի ֆեյսբուքյան գրառումը. «1994թ-ից սկսած մենք թերագնահատում էինք մեր թշնամուն։ Ամեն անգամ ծաղրանքով էինք վերաբերվում իրենց հայտարարություններին՝ պնդելով, որ խելոք մնան, թե չէ Բաքվում թեյ ենք խմելու․․․ Այս ոչ օբյեկտիվ լինելուն նպաստում էր նաև, օրինակի համար, «կիլդիմ» կոչված մուլտիկների շարքը, որտեղ թշնամին ներկայացվում էր կեղտոտ, փնթի, անճար, միշտ փորձանքի մեջ հայտնվում և անխելք․․․ 2020թ-ից սկսվեց ճիշտ հակառակ գործընթացը, սկսվեց թշնամուն գերագնահատելը։ Այս անգամ էլ սկսվեց ավելի շատ գերագնահատել թշնամու ֆինանսական հնարավորությունները, կապերը, բանակի խիստ արդիական լինելը, անսխալական լինելը, օդը, ցամաքը, ջուրը գերպաշտպանված լինելը․․․ Հենց այս ոչ իրատեսական լինելն է մեզ խնդիր առաջ կանգնեցնում։ Կա՛մ թերագնահատում ենք, կա՛մ գերագնահատում, բայց ոչ երբեք իրական պատկերի մասին խոսում։ Թշնամու բանակում կոռուպցիան առհելի չափերի է հասել։ Ադրբեջանական բանակի զորամասի հրամանատարներն այնպիս հարստության են տիրապետում, որի ձեռք բերման համար իրենք առնվազն պետք է մի հարյուր կյանք ապրեին, որպեսզի զորամասի հրամանատարի աշխատավարձով դրան հասնեին։ Ադրբեջանական բանակի գեներալները հանգիստ կարող են հայտնվել աշխարհի մեծահարուստների ցանկում, եթե մի օր որոշեն հայտարարագրել իրենց միջոցները․․․ Հենց այս կոռուպցիայի պոչից եթե բռնենք ու գնանք թշնամու բանակ, ապա կտեսնենք իրական պատկերը, ապա կարող ենք իրականությանը մոտ վերլուծություն կատարել, ոչ թե նստել և օդում հաշվել բեռնատար ինքնաթիռները, որոնք անհայտ է, թե քանի տոննա ենթադրյալ ռազմամթերք են տեղափոխում քանի միլիարդ փոխանցումների դիմաց։ Թշնամին առաջնագծում, այն մասում, որտեղից անզեն աչքով ինքներս կարող ենք տեսնել, ամրաշինական, ինժիներական աշխատանքներ է իրականացնում, այստեղ ևս պետք է կարողանանք դուրս գալ «տես ինչքան փող ունեն, ինչեր են սարքում» մտածելակերպից և հասկանալ, թե այդ ամրաշինական, ինժիներական աշխատանքներից քիչ հեռու, ոչ այդքան խորը թիկունքում, ինչ է կատարվում թշնամու բանակում․․․ Ասելս այն է, որ միայն իրատեսական լինելով կարող ենք ճիշտ գնահատել իրավիճակը, գտնել ամենաճիշտ ճանապարհը, որը մեզ կտանի դեպի հաղթանակ․․․»:
