«Դատական իշխանության անկախությունը կապահովվի անկախ մտածողությունը չբռնաբարելով»․ Հովհաննես Քոչարյան

Փաստաբան Հովհաննես Քոչարյանի ֆեյսբուքյան գրառումը․ «Մասնավոր կարծիք․
Ինչպե՞ս ապահովել դատական իշխանության անկախությունը։ Կոնկրետ գործերին չմիջամտելով ու դատական իշխանության անկախության սահմանադրական «կարմիր գծերի» վրա կանգնելով, դատական ապօրինություններն ու անգրագիտությունները վեր հանելով և հետևանքները վերացնելով, իրավունքի «ջահերին», հատկապես փորձառու, պետականորեն փայփայելով ու առաջ տանելով, նրանց անկախ մտածողությունը չբռնաբարելով, համարձակ ու հիմնարար իրավունք պաշտպանող դատական ակտերի ընդունումը խրախուսելով։
Ինչպե՞ս կարելի է բարձրացնել դատարանների հեղինակությունը՝ դատական ակտերի պատճառաբանվածությունն ու հիմնավորվածությունը իրապես ստուգելով, անմեղության կանխավարկածը, հումանիզմը, մրցակցությունն ու իրավահավասարությունը յուրաքանչյուր կոնկրետ գործով իրական և շոշափելի դարձնելով, որը մեկ բառով կոչվում է արդարադատություն։
Ովքե՞ր կարող են դա ապահովել։ Փաստաբանական համայնքում և ակադեմիական շջանակներում հեղինակություն ունեցող և վստահություն վայելող դատավորները, որոնք թվով շատ չեն, բայց եթե նրանք իրենց տեղը գտնեն վերաքննիչ և վճռաբեկ դատարաններում, մեծ ծառայություն կմատուցեն բարձրագույն իշխանությանը, որովհետև վերջինիս «կընծայեն» արձանագրված հաջողությունները՝ որպես իշխանության ճիշտ քաղաքականության արդյունք կապիտալացնելու հնարավորություն»: