«Ադրբեջանցիները քցել են ու քցելու են»․ Լևոն Քոչարյանը՝ Արարատ Միրզոյանին

«Հիմար բաներով խաբել եք դուք ու ձեր իշխանությունը այս տարիների ընթացքում, ոչ թե մենք, մենք փորձում ենք իրականությունը ցույց տալ մեր ժողովրդին»,- ԱԺ-ում, խոսքն ուղղելով ԱԳ նախարար Արարատ Միրզոյանին, ասաց «Հայաստան» խմբակցության պատգամավոր Լևոն Քոչարյանը՝ ի պատասխան նախարարի՝ «մարդկանց հիմար բաներով մի խաբեք» արտահայտությանը։
Նշենք, որ ԱԺ արտաքին հարաբերությունների մշտական հանձնաժողովում Արարատ Միրզոյանը ներկայացրեց գերատեսչության 2024 թվականի կատարած աշխատանքները, ինչպես նաև քննարկումներ ծավալվեցին Խաղաղության համաձայնագրի համաձայնեցված տեքստի շուրջ։
Լևոն Քոչարյանի խոսքով, երբ իրենք փորձում են մտահոգիչ հարցեր բարձրացնել կապված համաձայնագրի հետ, իշխանությունն անմիջապես այն տանում է դեպի «խաղաղություն կամ պատերազմ դիսկուրսի մեջ»։ «Մենք գործ ունենք Ադրբեջանի հետ, ով քնած հային սպանողին հերոսացրել է, ով տարեց դիակներ է պղծել և ի վերջո էթնիկ զտում է իրականացրել ու շարունակում է ցինիկաբար դատել մեր հակրենակիցներին։ Մենք դեմ չենք խաղաղությանը, մենք ասում ենք՝ սա մի երկիր է, որի հռետորաբանությունը չի համընկնում ձեր հռետորաբանությանը։ Դուք ճանաչել եք Ադրբեջանի տարածքային ամբողջականությունը կոնկրետ քառակուսի կիլոմետրով, սակայն կասկածում եմ, որ իրենք դա անելու են։ Դուք վերադարձրել եք գերիներին, իրենք՝ ոչ․․․»,- ասաց Քոչարյանը՝ հավելելով, որ Ադրբեջանը ստանում է այն, ինչ ուզում է, իսկ ՀՀ-ի գլխին կախված վտանգները մնում են նույնը։ «Մենք տեսնում ենք միայն այս իշխանության կողմից զիջումներ, ի վերջո գիտենք, թե Թուրքիայի և Ադրբեջանի նպատակները որոնք են, կներեք, որ ձեր լավատեսությունը չենք կիսում․․․Ադրբեջանցիները քցել են ու քցելու են»,- ասաց Լևոն Քոչարյանը։
«Իհարկե մարտահրավերներ կան, բայց դրանց կառավարելու միակ ձևը բանակցելն է»,- պատասխանեց Արարատ Միրզոյանը՝ հավելելով, որ Ադրբեջանի հետ հարաբերությունների կարգավորման հարցը շատ տարիներ առաջ էր պետք լուծել․ «Դուք լավ գիտեք, որ էդ հարցը պետք էր լուծած լինեիք էն ժամանակ»,- ասաց նախարարը։