Բորիս Ջոնսոնը կոչ է արել Արևմուտքին` թույլ տալ Կիևին` խոցել Ռուսաստանի թիրախները

Մեծ Բրիտանիայի նախկին վարչապետ Բորիս Ջոնսոնը Կուրսկի շրջանի վրա Ուկրաինայի հարձակումից հետո կոչ է արել՝ Կիևին թույլ տալ խոցել Ռուսաստանի թիրախները արևմտյան զենքով, որպեսզի «գործն ավարտվի»։
Ջոնսոնը Կուրսկի շրջանի վրա Ուկրաինայի հարձակումն անվանել է «լավագույն նորություն վերջին ժամանում»։ Սակայն, միևնույն ժամանակ, նա խոստովանել է ռուսական զորքերի հաջողությունը Դոնբասում, որտեղ Ռուսաստանի Դաշնությունը ծրագրավորվող ռումբեր է օգտագործում:
«(Ռուսական - խմբ.) ռումբերը կասեցնելու միակ միջոցը ավիաբազաներին հարվածելն է, որոնք օգտագործվում են ռուսական ինքնաթիռների կողմից, և այդ բազաներին խոցելու միակ միջոցը նրանց (ուկրաինացիների - խմբ.) արդեն իսկ ունեցած տեխնիկայի օգտագործումն է: Ուկրաինացիներն ստացել են ATACMS համակարգերը ԱՄՆ-ից, իսկ Storm Shadow-ն՝ Բրիտանիայից. այն, ինչ նրանք չունեն, դա անհրաժեշտ թույլտվությունն է»,- գրել է Ջոնսոնը Daily Mail-ի սյունակում:
Նախկին վարչապետի խոսքով՝ ուկրաինացի զինվորականները չեն կարողացել պատշաճ կերպով հակահարված տալ, քանի որ Արևմուտքը «ստիպել է նրանց կռվել՝ մի ձեռքը մեջքից կապած»։