Մեղրիի՝ բացառիկ որմնանկարներով եկեղեցին

Մեղրի քաղաքը հարուստ է բազմաթիվ եկեղեցիներով, սակայն նրանցից հատկապես աչքի է ընկնում 17-րդ դարում Փոքր թաղում կառուցված Սբ Հովհաննես եկեղեցին, որը վերջերս է վերանորոգվել և բացվել այցելուների համար: Եկեղեցին աչքի է ընկնում հարուստ որմնանկարներով, ինչպիսին չենք տեսնում հայկական այլ եկեղեցիներում։

Վերջին նորոգության ժամանակ որմնանկարները նույնպես նորոգվել, գույները թարմացվել են:

Մասնագետները այս որմնանկարները թվագրում են տարբեր ժամանակներով։ Անգամ կարծիք կա, որ այստեղ աշխատել են որմնանկարիչների հայտնի տոհմի՝ Հովնաթանյանների ներկայացուցիչները:

Եկեղեցու պատերը ներսից ամբողջովին նկարազարդ են, այստեղ տեսնում ենք Հին և Նոր կտակարանային բազմաթիվ տեսարաններ։ Հայկական և պարսկական որմնանկարչական ավանդույթներով ստեղծված այս որմանկարները յուրահատուկ, իսկ վերանորոգումից հետո անցկացված լուսավորությունը՝ խորհրդավոր ու անչափ տպավորիչ են դարձրել եկեղեցին:

Ավելացնենք, որ Մեղրիի Սբ Հովհաննես եկեղեցին վերանորոգվել է ԱՄՆ պետքարտուղարության կողմից ֆինանսավորվող ԱՄՆ դեսպանի մշակութային ժառանգության պահպանության հիմնադրամի միջոցներով, որի համար հատկացվել էր մոտ մեկ միլիոն դոլար:

Եկեղեցու վերականգնումը խորհրդանշական է Մեղրի քաղաքի համար, հատկապես վերջին շրջանում այս տարածաշրջանի շուրջ եղած մեծ հետաքրքրության շրջանակներում:

Մինչ վերականգնումը 17-րդ դարի այս եկեղեցին գտնվում էր խիստ վթարային վիճակում: