Հայտնի է՝ երբ կկայանա ՀՀ–ի, ՌԴ-ի և Ադրբեջանի փոխվարչապետերի հաջորդ հանդիպումը

Հայաստանի, Ադրբեջանի և Ռուսաստանի փոխվարչապետեր Մհեր Գրիգորյանի, Շահին Մուստաֆաևի և Ալեքսեյ Օվերչուկի՝ տարածաշրջանում հաղորդակցության ապաշրջափակման վերաբերյալ 2-րդ հանդիպումը տեղի կունենա փետրվարին: Այս մասին ТАСС-ի թղթակցին հայտնել են ՀՀ փոխվարչապետի մամուլի ծառայությունից։
«Հայաստանի, Ռուսաստանի և Ադրբեջանի փոխվարչապետերի 2-րդ հանդիպումը կկայանա փետրվար ամսվա ընթացքում»,- նշել են մամուլի ծառայությունում:
Մամուլի ծառայությունը նաև հավելել է, որ փոխվարչապետների որոշմամբ ստեղծվել է 2 փորձագիտական ենթախումբ: Դրանց կազմում հայկական կողմից կընդգրկվեն ազգային անվտանգության ծառայության, ԱԳՆ-ի, Էկոնոմիկայի, տարածքային կառավարման և ենթակառուցվածքների նախարարության ներկայացուցիչներ։ Ներկայացուցիչներ կլինեն նաև ՊԵԿ-ից ու Սննդամթերքի անվտանգության տեսչությունից:
3 երկրների փոխվարչապետերի առաջին հանդիպումը կայացել է հունվարի 30-ին Մոսկվայում: