Քլինթոնը հրապարակել է Թրամփի նամակի պարոդիան՝ ուղղված Խրուշչովին

2016-ին նախագահական ընտրություններում Դոնալդ Թրամփին պարտված Հիլարի Քլինթոնը ծաղրել է Թրամփի նամակը՝ ուղղված Էրդողանին: Քլինթոնը Twitter-ի իր էջում հրապարակել է Քենեդիի անունից Խրուշչովին ուղղված «նամակը», որն իբր արխիվներում է գտնվել, փոխանցում է RBK-ն։

1962-ին թվագրված «նամակում» Թրամփի՝ Էրդողանին ուղղված նամակի ոճով Քենեդին խնդրում է, որպեսզի Խրուշչովը սովետական հրթիռները հեռացնի Կուբայից:

«Ձեր հրթիռները տարե՛ք Կուբայից: Բոլորը կասեն. «Վաու, Խրուշչով, դու ամենալավն ես»: Բայց եթե դա դու չանես, ապա կլինի. «Ինչպիսի ստոր էակ ես» և քո աղբային երկիրը կանվանեն «The Soviet Bunion» (խմբ․՝ օրիգինալում «union», որը թարգմանվում է «միություն» և «bunion» բառը, որը անգլերեն նշանակում է ոտքի բութ մատի ելուստ)»,- նշվում է «նամակում», որն ավարտվում է «գրկախառնվել» բառով: