Բեռլինում անվտանգության առավելագույն մակարդակ է հայտարարվել. Զելենսկին հանդիպում է Թրամփի բանագնացների հետ

Ուկրաինայի նախագահ Վլադիմիր Զելենսկին Բեռլին է այցելել «ԱՄՆ-ի խաղաղության ծրագրի» շուրջ բանակցությունների համար: Գերմանիայի մայրաքաղաքի կենտրոնում ձեռնարկվել են լայնածավալ անվտանգության միջոցառումներ, հաղորդում է Bild-ը։

Ամերիկացի բանակցողները նույնպես արդեն Բեռլինում են։ Այդ պատճառով մայրաքաղաքում արտակարգ դրություն է հայտարարվել։ «Զելենսկու համար սահմանվել է 0 անվտանգության մակարդակ՝ ամենաբարձրը։ Սա նշանակում է, որ կարելի է սպասել հարձակման կամ մահափորձի։ Համապատասխանաբար, Բեռլինը ուժեղացնում է անվտանգության միջոցառումները, իսկ ոստիկանությունը բարձրացրել է իր անվտանգության մակարդակը մինչև ամենաբարձրը», - նշում է լրատվականը։

Հրապարակման համաձայն՝ Բեռլինի բնակիչներին կոչ է արվում խուսափել կառավարական թաղամասից։ VIZ երթևեկության տեղեկատվական կենտրոնը զգուշացրել է փողոցների փակման մասին ամբողջ օրվա ընթացքում։

Bild-ը նշում է մի շարք այլ անվտանգության միջոցառումներ, որոնք ձեռնարկվել են Զելենսկու նախորդ այցելությունների ժամանակ, այդ թվում՝ 2025 թվականի օգոստոսին։ Այդ միջոցառումները ներառում էին դիպուկահարներ տանիքին (այդ թվում՝ կանցլերի շենքի վրա և ուղղաթիռներում), դիտահորերի կափարիչների կնքում, պայթուցիկ նյութեր որոնող շների օգտագործում, անցակետեր, անօդաչու թռչող սարքերով պաշտպանություն, օդային տարածքի հսկողություն, ոստիկանական նավակներ և սպաներ ջրային մոտոցիկլետներով Շպրի գետում, ինչպես նաև տարբեր դաշնային նահանգներից ոստիկանական ուժերի տեղակայում, կառավարական և խորհրդարանական շենքերի ճանապարհների լիակատար փակում, մետրոյի, մերձքաղաքային գնացքների և BER օդանավակայանի ուշացումներ: Գնացքները շարժվում են նվազեցված արագությամբ և կարող են անսպասելիորեն կանգ առնել։

Դեկտեմբերի 14-ին Բեռլինում բանակցություններ կանցկացվեն Ուկրաինայի նախագահ Վլադիմիր Զելենսկու և Թրամփի հատուկ դեսպանորդ Սթիվեն Ուիթքկոֆի ու փեսայի՝ Ջարեդ Քուշների միջև: Կլինեն նաև հանդիպումներ եվրոպացի առաջնորդների հետ: Կողմերը կշարունակեն բանակցություններն ԱՄՆ-ի «խաղաղության ծրագրի» շուրջ, քանի որ Սպիտակ տունը, ըստ Wall Street Journal-ի, մտադիր է խաղաղության համաձայնագրի հասնել մինչև տարեվերջ։