«Լոռի»-ն 60 հազար դոլար է վճարել՝ տրանսֆերի համար

«Լոռի» ֆուտբոլային ակումբը տրանսֆերային պատուհանի վերջին ժամերին ձեռք է բերել հարձակվող Ջոնել Դեսիրեի տրանսֆերային իրավունքները։

Դեսիրեն նախորդ մրցաշրջանում «Լոռի»-ում հանդես է եկել վարձավճարով, և ամռանը «Լոռի»-ն, չնայած տարած մեծ աշխատանքներին, չի կարողացել պահել նրան Վանաձորում։

Այնուամենայնիվ, հաշվի առնելով երկրպագուների ձայնը և այն հանգամանքը, որ Դեսիրեն անձամբ էր ցանկանում վերադառնալ Վանաձոր, «Լոռի»-ն վերջին օրերին վերսկսել է բանակցությունները Հայիթիի Պրեմիեր լիգայի «Միրեբալաիս» ակումբի հետ և համաձայնության հասել։ Ջոնել Դեսիրեի տրանսֆերային իրավունքների համար «Լոռի» ՖԱ-ն վճարել է 60,000 ԱՄՆ դոլար։ Ջոնել Դեսիրեն «Լոռի»-ի հետ կնքել է երեք տարվա պայմանագիր։

22-ամյա Դեսիրեն «Լոռի»-ի կազմում 2018/19 թթ․ մրցաշրջանում մասնակցել է Բարձրագույն խմբի առաջնության 25 խաղի, դարձել 17 գոլի և 4 գոլային փոխանցման հեղինակ։

Հաիթիի ազգային հավաքականի կազմում Դեսիրեն մասնակցել է 14 հանդիպման, խփել 1 գոլ։