«Բաքուն կարող է հետ կանգնել Վաշինգթոնի պայմանավորվածությունից»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը․ «Թուրքիան նախարարի մակարդակով հայտարարել է, որ Հայաստանի հետ սահմանը կբացի միայն այն դեպքում, եթե հայ-ադրբեջանական պայմանագիրը վավերացվի:
Ադրբեջանը հերթական անգամ հասավ իր նպատակին՝ փակ պահել Թուրքիա-Հայաստան սահմանը, առնվազն՝ դեռ որոշ ժամանակ:
Թուրք-հայկական սահմանի բացումն այնքան անընդունելի է Ադրբեջանի համար, որ, կարծում եմ, Բաքուն կարող է անգամ հետ կանգնել Վաշինգթոնի պայմանավորվածությունից, և, բնականաբար, դրա պատասխանատվությունը դնել Հայաստանի ռևանշիստական ուժերի վրա: Կարելի է ասել, որ բացի իշխող ուժը՝ ՔՊ-ն, Ալիևի համար մյուսները ռևանշիստներ են:
Վերջին շաբաթներին Ալիևը հստակ թիրախավորում է նաև Հայաստանի վարչապետին, ինչը չէր անում ավելի քան մեկ տարի:
Պարզապես ուզում եմ ֆիքսենք, որ կարող է մի իրավիճակ ստեղծվել, որի պայմաններում մենք արդեն երազենք Վաշինգթոնի նախաստորագրված փաստաթուղթը, բայց Ադրբեջանը արդեն սեղանին ունենա մեզ համար շատ ավելի վատ պայմաններով համաձայնագիր»: