Հայկական ակումբները պատմական ռեկորդ են սահմանել

Հայկական ակումբները եվրագավաթների ընթացիկ խաղարկությունում հայկական ֆուտբոլի պատմության ռեկորդ են սահմանել: Հայկական ակումբները հաղթել են 8 խաղում, 2 հանդիպում ավարտել ոչ-ոքի, կրել 4 պարտություն: Հայկական ակումբների՝ ՈՒԵՖԱ-ի գործակիցն ընթացիկ մրցաշրջանում կազմում է 2,25 միավոր: Վերջին 5 տարվա ցուցանիշը հաշվի առնելով՝ (7,125 միավոր) Հայաստանը բարձրացել է 37-րդ հորիզոնական: 4 ակումբից երկուսը շարունակում են ելույթները. Եվրոպա լիգայի որակավորման 3-րդ փուլում «Արարատ-Արմենիա»-ն կխաղա Վրաստանի չեմպիոն «Սաբուրթալո»-ի հետ: Հարևան երկրների ֆուտբոլային դիմակայությունը պատմականորեն մեծ հետաքրքրություն է առաջացրել: Այս անգամ ևս լարված և ուշագրավ խաղեր են սպասվում:

Անկախությունից հետո առաջին անգամ Հայաստանի ներկայացուցիչը կխաղա Անգլիայի Պրեմիեր լիգայի թիմի հետ: Երևանի «Փյունիկ»-ն ուժերը կչափի «Վուլվերհեմփթոն»-ի հետ: Պրեմիեր լիգայի նախորդ մրցաշրջանը «Վուլվերհեմփթոն»-ն ավարտել է 7-րդ տեղում: