Արայիկ Հարությունյանը հանդիպել է Ունիվերսիադա մեկնող մարզիկների հետ

Հուլիսի 3-ից 14-ն Իտալիայի Նեապոլ քաղաքում կայանալիք ամառային 30-րդ համաշխարհային Ունիվերսիադային կմասնակցի նաև Հայաստանի հավաքականը: Պատվիրակության անդամներին այսօր ՀՀ կրթության, գիտության, մշակույթի և սպորտի նախարարությունում ընդունել են նախարար Արայիկ Հարությունյանը, նախարարի տեղակալներ Գրիշա Թամրազյանն ու Գևորգ Լոռեցյանը:

Նախարար Հարությունյանը հաջողություն է մաղթել ուսանող մարզիկներին՝ նշելով, որ պետությունը կարևորում է ուսանողական սպորտի զարգացումը և առաջիկայում այս ոլորտում լուրջ փոփոխություններ են նախատեսվում: Մասնավորապես, ինչպես նշել է նախարարը, նախատեսվում է ստեղծել ուսանողական մարզական լիգաներ. «Պետության համար, նաև միջազգային ասպարեզում դիրքերն ամրապնդելու առումով, կարևոր են սպորտային հաղթանակները: Միջազգային քաղաքականության մեջ սպորտը կարևոր տեղ ունի և պատահական չէ, որ հզոր պետությունները ձգտում են մասնակցել ամենահզոր ստուգատեսներին և գրավել բարձր տեղեր: Մեր պետությունը ևս կարևորում է սպորտային ձեռքբերումները՝ այն դիտարկելով միջազգային դիրքերի ամրապնդման միջոց»,- նշել է Արայիկ Հարությունյանը: