Նախագահի աշխատակազմի աշխատավարձի ֆոնդից մոտ 190 մլն դրամից ավելի խնայվել է թափուր տեղերի հաշվին

Այսօր՝ ԱԺ պետաիրավական և ֆինանսավարկային ու բյուջետային հարցերի մշտական հանձնաժողովների համատեղ նիստում, 2018-ի բյուջեի կատարողականի քննարկման ժամանակ ՀՀ նախագահի աշխատակազմի ղեկավար Էմիլ Տարասյանը նշեց, որ անցում կատարելով խորհրդարանական կառավարման համակարգին, ՀՀ նախագահի աշխատակազմի թիվը կրճատվել է՝ 300-ից դառնալով 155: Ըստ այդմ՝ նախագահի աշխատակազմի աշխատավարձի ֆոնդից մոտ 190 մլն դրամից ավելի խնայվել է թափուր տեղերի հաշվին:

Պետաիրավական հարցերի հանձնաժողովի նախագահ Վլադիմիր Վարդանյանի հարցին, թե ՀՀ նախագահը ո՞ր սահմանադրական լիազորությունների շրջանակներում է միջազգային ասպարեզում հանդիպումներ ունենում, Տարասյանը նշեց. «Սահմանադրական գործառույթների մասով, երբ ՀՀ նախագահը հանդիպումներ ու քննարկումներ է ունենում, պարտադիր մասնակից է դարձնում կառավարության լիազոր գերատեսչություններին: Քննարկվող ծրագրերը և ԱԳՆ-ին է ներկայացվում և մասնակից ենք դարձնում կառավարության համապատասխան մարմիններին, որոնք զբաղվում են այդ ծրագրերի իրականացմամբ»: