«Խնդիրն այն է, որ ընդդիմությունը, շատ հնարավոր է, դառնա այս թատրոնի մաս». Էդմոն Մարուքյան

Պլատֆորմ փոդքասթի շրջանակներում անդրադառնալով ՀՀ վարչապետ Նիկոլ Փաշինյանի՝ «ՏԻՄ ընտրությունների մասնակից բոլոր այն թեկնածուներին, կամ ընտրողներին, ովքեր ասում են, որ ենթարկվել են ապօրինի ճնշումների, կոչ եմ անում դիմել ուղիղ ինձ, [email protected] էլփոստի հասցեով։ Հրապարակային պարտավորվում եմ. ասվածը հիմնավորվելու դեպքում նման գործողության հեղինակ ցանկացած պաշտոնյա հրապարակային կպատժվի» գրառմանը, ԼՀԿ ղեկավար Էդմոն Մարուքյանն ասել է. «Պրոբլեմն այն է, որ ընդդիմությունը, շատ հնարավոր է, դառնա այս թատրոնի մաս: Այսինքն՝ սկսեն Նիկոլին դիմել, որ՝ ա՜յ, ինձ խանգարում է այսինչ գյուղի այսինչ տրակտորիստը, որը ՔՊ անդամ է, պատժե՛ք, Նիկոլն էլ պատժի ու ասի՝ նայեք՝ ի՜նչ ժողովրդավարական երկիր ենք... Նա պատրաստ է ամեն ինչ անել, ամենքին պատժել, միայն թե պառլամենտի մանդատագողությունը մարսի»: