«Իսրայելն Ադրբեջանին 235 մլն դոլարի PULS հրթիռային համակարգեր ու EXTRA-MR հրթիռներ կմատակարարի»․ #Globes

Իսրայելական Elbit Systems ընկերությունը հայտնել է, որ 235 միլիոն դոլարի պայմանագիր է կնքել՝ երկրներից մեկին EXTRA-MR (միջին հեռահարության) հրթիռներ և PULS համազարկային կրակի ռեակտիվ համակարգեր մատակարարելու համար։ Գործարքն իրականացվելու է Իսրայելի պաշտպանության նախարարության և գնորդ երկրի պաշտպանության նախարարության միջև կառավարությունների մակարդակով ձեռք բերված համաձայնագրի շրջանակում։ Պայմանագիրը նախատեսվում է իրականացնել երեք տարվա ընթացքում։

Globes-ին աղբյուրների համաձայն՝ խոսքն Ադրբեջանի մասին է։

Պայմանագրի համաձայն՝ Elbit Systems-ը կմատակարարի իր EXTRA գերձայնային հրթիռային համակարգի միջին հեռահարության տարբերակը։ Գործարքը ներառում է նաև PULS արձակման կայանքների, հրթիռային հրետանու լրացուցիչ հարթակների մատակարարում, ինչպես նաև համալիր լոգիստիկ աջակցություն։ EXTRA-MR-ը միջին հեռահարության օպերատիվ խնդիրների համար նախատեսված բարձր ճշգրտության կառավարվող հրթիռ է, որը հնարավորություն է տալիս ճշգրիտ հարվածներ հասցնել հակառակորդի թիրախներին մինչև 80 կմ հեռավորության վրա։