Ֆրանսիայում տորնադոյի հետևանքով 41 մարդ է տուժել

Նախօրեին Ֆրանսիայի հարավ-արևմուտքում տորնադո է գրանցվել՝ զգալի վնասներ պատճառելով տարածաշրջանի բնակավայրերին։ Ամենաշատը տուժել է մոտ հազար բնակիչ ունեցող Պումաս գյուղը, որտեղ վնասվել է շուրջ 300 տուն։ Որոշ շենքերի տանիքներ պոկվել են։ Առնվազն 41 մարդ վնասվածքներ է ստացել։ 15 տուժած տեղափոխվել է հիվանդանոց։

Տարերքն ուղեկցվել է ուժեղ քամիներով, կարկտահարությամբ և էլեկտրամատակարարման խափանումներով։ Տարածաշրջանի տասը բնակավայրերում մոտ 2800 տուն մնացել է առանց էլեկտրականության։

Ֆրանսիայի ազգային օդերևութաբանական ծառայության՝ Meteo-France-ի տվյալներով՝ հարևան Արկետ-ան-Վալ գյուղում քամու արագությունը հասել է 117 կմ/ժ-ի։