««Ժողբաստիոն» Հայաստանում անմեղ մարդը կարող է ազատությունից զրկվել, որովհետև մի հոգի այդպես է ուզում». Վահագն Սարոյան

Ռազմական փորձագետ Վահագն Սարոյանի ֆեյսբուքյան գրառումը․ «Այսօր ավելի ու ավելի հաճախ է հնչում այն կարծիքը, որ Հայաստանը, ցավոք, հարստանում է ոչ թե նոր ձեռքբերումներով, այլ քաղաքական հետապնդումների ենթարկված անձանց քանակով ու քաղբանտարկյալներով:
Արմեն Աշոտյանի կալանավորման արդեն երկրորդ ամիսն է լրանում, չհաշված որ քանի-քանի այդպիսի երկու ամիսներ է անցկացրել Աշոտյանը անազատության մեջ՝ լինելով անմեղ:
Բոլորին էլ քաջ հայտնի է, որ այս իշխանությունը միանգամից փակում է, կալանավորում ու ձերբակալում է իրեն անհարմար քաղաքական գործիչներին: Գիտեն նաև բոլորը, որ հարուցված գործերը հեչ էլ պարտադիր չէ, որ ունենան իրավական կշիռ: Ֆորմուլան շատ պարզ է՝ կա քաղաքական որոշում, գործի հարուցումն ու մարդկանց փակելը դառնում է տեխնիկայի հարց:
Սակայն մի պահ այս իրավիճակին եթե նայենք ոչ թե քաղաքական, այլ մարդկային տեսանկյունից, մարդու զգացական, հուզական ու հոգեբանական տեսանկյունից...
Մարդուն ապօրինաբար կտրել են իր բնականոն կյանքից, ընտանիքից, ընկերներից, աշխատանքից ու հասարակական գործունեությունից։
Ինչո՞ւ, որովհետև «ժողբաստիոն» Հայաստանում անմեղ մարդը կարող է այս ամենից զրկվել, որովհետև մի հոգի այդպես է ուզում:
Աշոտյանին թեպետ կարողացել են կալանավորել, բայց նրա արժանապատվությունն ու կամքը՝ ոչ, նրա գաղափարն ու ոգին՝ ոչ:
Մեր ընկերոջը ցանկանում եմ ծով համբերություն, քանի որ ազատությունը շուտով լինելու է»: