«Ուրսուլաների համար կարևորը բնակիչներին պայմանական մոսկվաների դեմ լարելն է»․ Կարեն Հեքիմյան

Հասարակական գործիչ Կարեն Հեքիմյանի ֆեյսբուքյան գրառումը․ «Եվրոհանձնաժողովի նախագահ Ուրսուլա ֆոն դեր Լայենը պատրաստվում է այցելել Հայաստան և Ադրբեջան: Ի՞նչ եք կարծում. նա պատրաստվում է անդրկովկասյան հանրապետություններում «եվրոարժեքնե՞ր» քարոզել: Մարդու արժանապատվության հանդեպ հարգա՞նք: Խոսքի, խղճի, կրոնի, հավաքների և արտահայտվելու ազատությո՞ւն: Ազատ և արդար ընտրություննե՞ր: Իրավունքի գերակայությո՞ւն: Խտրականության արգե՞լք: Հանդուրժողականությո՞ւն: Եվ ո՞ւմ: Փաշինյան Նիկոլի՞ն: Ալիև Իլհամի՞ն: ՔՊ-ի՞ն: «Ենի Ադրբեջան»-ի՞ն:
Իհարկե, ոչ: Ուրսուլա ֆոն դեր Լայենը չի էլ թաքցնում, որ նրա «ուղևորությունը նվիրված կլինի առևտրային և այլ կապերի ամրապնդմանը, ինչպես նաև Մոսկվայի՝ նախկին խորհրդային հանրապետություններում ազդեցությունը պահպանելու ջանքերին հակազդելուն»: Այլ կերպ ասած՝ դարերով ձևավորված «եվրոարժեքներն» էական փոփոխության են ենթարկվել: Այժմ ուրսուլաներին միևնույնն է, թե ինչ է կատարվում պետության ներսում, կարևորը՝ բնակիչներին պայմանական մոսկվաների դեմ լարելն է, «մսաղացի» մեջ մտցնելը, հետևաբար՝ պայմանական մոսկվաների ագրեսիայի սլաքը Եվրոպայից հեռացնելը: Որքան հեռու, այդքան լավ: Իսկ խոսքի, խղճի, ազատության, իրավունքի, արդար ընտրության, հանդուրժողականության վերաբերյալ հեքիաթներն այլևս անցյալում են:
Մի կողմից լավ է, որ ուրսուլաներն աստիճանաբար սկսել են «բացել» մարդկության աչքերը, մյուս կողմից՝ ափսոս, որ այլևս արժեքներ չկան:
Հյուսիսային Կորեան բռնապետություն է: «Եվրոարժեքների» մասին խոսելն այնտեղ արգելված է: Սակայն, եթե Կիմ Չեն Ինը մի օր որոշի «եվրոարժեքավոր» դառնալ և այդ հիմքով գումար աշխատել, ապա, հավատացեք, վեջինս ուրսուլաների պակաս չի զգա: Միամիտ է Կիմ Չեն Ինը, քանզի Իջևանում չի ծնվել»: