«ԵՄ-ն աջակցում է Փաշինյանին՝ ՀՀ-ն հակառուսական քաղաքականության գործիքի վերածելու նպատակով»․ Բենիամին Մաթևոսյան

Քաղաքագետ Բենիամին Մաթևոսյանի ֆեյսբուքյան գրառումը՝ կից տեսանյութով. «Արդյոք Կայա Կալասը պատրաստվում է ստանալ «Արևմտյան Ադրբեջանի» քաղաքացիություն: Ինչպես գիտեք, մի քանի օրից Երևանում տեղի է ունենալու «Եվրոպական քաղաքական համայնքի» գագաթնաժողովը: Այսօր ծանոթացա «Հայաքվե» նախաձեռնության հայտարարությանը, որով կոչ է արվում եվրոպացի մեր գործընկերներին չեղարկել այդ համաժողովը: Պատճառն այն է, որ նախընտրական այս փուլում նման միջոցառումը դիտարկվում է որպես ուղղակի և փաստացի աջակցություն Նիկոլ Փաշինյանին:
Արդյոք «Հայաքվեի» քաղաքական գնահատականը ճիշտ է: Միանշանակ՝ այո՛: Արդյո՞ք Եվրամիությունն ականջալուր կլինի այս կոչին: Իհարկե՝ ո՛չ: Նրանք աջակցել են և շարունակելու են աջակցել Փաշինյանին մի պարզ պատճառով. նրա անձով նրանք Հայաստանում տեսնում են այնպիսի գործընկերոջ, ում միջոցով կարող են երկիրը վերածել հակառուսական քաղաքականության գործիքի: Այդ իսկ պատճառով, նրանք գործադրելու են հնարավոր բոլոր մեթոդները նրան սատարելու համար:
Մեր ամերիկացի գործընկերները նույնպես փաստացի աջակցում են իշխանություններին: Օրինակ կարելի է բերել Ջեյ Դի Վենսի այցը կամ այն փաստը, որ ամերիկյան կողմը, հայտնի մի ՀԿ-ի խնդրանքով, Հայաստանում արգելափակում է սոցիալական ցանցերի էջեր ու յութուբյան ալիքներ: Այսինքն՝ որոշակի շրջանակներում կա հստակ կոնսենսուս՝ Փաշինյանի ձեռքերով Հայաստանը դարձնել հակառուսական քաղաքականության մաս և հայոց պետականությունը տանել դեպի կառափնարան՝ ընդդեմ Ռուսաստանի Դաշնության:
Սակայն մենք պետք է գիտակցենք, թե ինչ գին է վճարելու Հայաստանն այս ամենի համար: Այդ գնի վերաբերյալ ամենաանկեղծ կանխատեսումները հնչում են մեր հարևան Ադրբեջանից, որը Հայաստանը դիտարկում է որպես «Արևմտյան Ադրբեջան»: Այստեղ է, որ առաջանում է տրամաբանական հարցը. լավ, Կայա Կալասը կգա Երևան, կաջակցի Փաշինյանին, Եվրամիության ուղարկած արագ արձագանքման խումբը կօգնի պայքարել «հիբրիդային սպառնալիքների» դեմ, կփակվեն տասնյակ ալիքներ... բայց երբ Ադրբեջանն անցնի գործնական քայլերի՝ Հայաստանը «Արևմտյան Ադրբեջանի» վերածելու համար, արդյո՞ք Կայա Կալասը պատրաստ է լինելու ստանալ այդ կազմավորման քաղաքացիություն:
Թե՞ նրանց միայն անհրաժեշտ է, որ Հայաստանն արժանանա Արցախի Հանրապետության ճակատագրին: Տեսե՛ք, այսօր Արցախը չկա, սակայն եվրոպացի մեր գործընկերների ընկալմամբ՝ կարևորն այն չէ, որ Արցախը հայաթափվել է, այլ այն, որ այնտեղ այլևս չկան ռուս խաղաղապահներ:
Եթե Հայաստանը նույնպես դադարի գոյություն ունենալ, և ռուսական գործոնն այստեղ վերանա, արդյո՞ք դա Եվրամիության համար դրական արդյունք կլինի: Մտորե՛ք այս մասին և փորձե՛ք ինքնուրույն պատասխանել այդ հարցին. Եվրամիության և Էստոնիայի քաղաքացի Կայա Կալասը պատրաստվո՞ւմ է ստանալ «Արևմտյան Ադրբեջանի» քաղաքացիություն, թե՞ ոչ»: