Մարսագնացի պատահական բացահայտումը. Կարմիր մոլորակը կրկին զարմացրել է

NASA-ի Curiosity մարսագնացը, անցնելով Մարսի Գեդիզ Վալլիս հովտով, պատահաբար կոտրել է մի քար, որի ներսում գիտնականները մաքուր ծծումբ են գտել: Սա իսկական անակնկալ էր մասնագետների համար, քանի որ մինչ այժմ Կարմիր մոլորակի վրա հանդիպել էին միայն ծծմբի միացություններ (սուլֆատներ), իսկ ծծումբն իր մաքուր տեսքով այնտեղ տեսնում են առաջին անգամ:
Այս գտածոն նոր հարցեր է առաջացնում: Մաքուր ծծումբն առաջանում է շատ յուրահատուկ պայմաններում, որոնց գոյությունը Մարսի այդ հատվածում մինչ այս որևէ կերպ չէր հաստատվել: Սա նշանակում է, որ մոլորակի պատմության մեջ կան էջեր, որոնք մեզ դեռ անհայտ են:
Հայտնագործությունը կարևոր է նաև կյանքի հետքերի որոնման համար: Ծծումբը կենսական նշանակություն ունեցող տարրերից է: Թեև մաքուր ծծմբի առկայությունն ինքնին չի ապացուցում, որ Մարսի վրա երբևէ կյանք է եղել, այն ևս մեկ կարևոր դետալ է ավելացնում ընդհանուր պատկերին. մոլորակի վրա արդեն հայտնաբերվել են ջուր, անհրաժեշտ քիմիական տարրեր և պայմաններ, որոնք միլիոնավոր տարիներ առաջ կարող էին պիտանի լինել կյանքի համար:
Եթե Curiosity-ն պատահաբար չանցներ հենց այդ քարի վրայով ու չջարդեր այն, այս հայտնագործությունը գուցե դեռ երկար ժամանակ չարվեր: Այժմ NASA-ի մասնագետները փորձում են հասկանալ, թե ինչպես է մաքուր ծծումբը հայտնվել Մարսի մակերևույթին և ինչ նոր գաղտնիքներ կարող է այն բացահայտել: