Իտալիայում մակարոնեղենի գործարանի ընդլայնման աշխատանքների ընթացքում 2600-ամյա նեկրոպոլ է հայտնաբերվել

Իտալիայում՝ Նեապոլի մոտ գտնվող Գրանյանո քաղաքում, Pasta Garofalo մակարոնեղենի գործարանի ընդլայնման աշխատանքների ընթացքում 2600 տարվա վաղեմության նեկրոպոլ է («մեռյալների քաղաք») հայտնաբերվել։ Այս մասին հայտնում է Fox News-ը։ Մեկ տարվա ընթացքում ձեռնարկության տարածքում պեղումներ են իրականացվել՝ արտադրական հզորությունների ընդլայնման նախաշեմին։

Հայտնաբերված նեկրոպոլը հնագիտական համալիր է, որը թվագրվում է մ.թ.ա. VI դարի առաջին կեսով։ Այն կառուցվել է Միջերկրածովյան պատմության արխայիկ ժամանակաշրջանում՝ Հռոմեական կայսրության վերելքից դարեր առաջ։

Մասնագետները հայտնաբերել են քարե դամբարանախցեր, մարդկային մնացորդներ, խեցեղեն և այլ արտեֆակտներ։ Դամբարանախցերի ներսում հայտնաբերվել են գործվածքներ, փայտե իրեր և հյուսված զամբյուղներ։ Տեղական իշխանությունների տեղեկություններով՝ թաղման վայրերում հայտնաբերվել են եգիպտական սկարաբներ, կենդանիների տեսքով սաթե զարդեր, ինչպես նաև «էտրուսկական ծագման արծաթե և բրոնզե արտեֆակտներ»։

Գրանյանոյի իշխանությունների խոսքով՝ այս գտածոները վկայում են Միջերկրածովյան առևտրային ցանցերում հնագույն Գրանյանոյի տարածքի ունեցած կենտրոնական դերի մասին․ այն կապում էր հունական, եգիպտական և էտրուսկական աշխարհները։