«ՀՀ-Ադրբեջան խաղաղության համաձայնագիրը լայն հնարավորություններ է բացում նաև ԵՄ-ի համար»․ Մերց

Գերմանիայի կանցլեր Ֆրիդրիխ Մերցը Նիկոլ Փաշինյանի հետ համատեղ մամուլի ասուլիսի ընթացքում նշել է, որ Գերմանիան մեծապես շահագրգռված է Եվրոպայի հետ Հայաստանի մերձեցմամբ․ «Մենք մեծ շահագրգռվածություն ունենք Եվրոպայի հետ Հայաստանի մերձեցմամբ։ Կոնկրետ նախագծերի շուրջ պայմանավորվածություն ունենք, Գերմանիան կօգնի Հայաստանին նաև մի շարք նախագծերում էներգամատակարարման ոլորտում ՝ այս ոլորտում ավելի մեծ անկախության հասնելու համար»։

«Մենք ուշադիր հետևում ենք Հարավային Կովկասում տեղի ունեցող զարգացումներին՝ մասնավորապես, Հայաստանի ու Ադրբեջանի միջև ընթացող խաղաղության գործընթացին: Հայաստանի և Ադրբեջանի միջև նախաստորագրված խաղաղության համաձայնագիրը համագործակցության լայն հնարավորություններ է բացում նաև Եվրոպական միության համար»,- նշել է Մերցը:

Նա նաև ընդգծել է, որ Գերմանիան մեծ սիրով ընդունել է այն հանգամանքը, որ Հայաստանը ցանկանում է շատ ավելի սերտացնել հարաբերությունները Եվրոպական միության հետ:

«Մենք գիտենք նաև այն, որ Եվրամիության անդամ դառնալու համար շատ նախադրյալներ, չափանիշներ պետք է բավարարվեն: Արդյոք դա լինելու է ասոցացման պայմանագրով, թե ոչ, պետք է որոշի տվյալ երկիրը: Մենք ցանկանում ենք քայլ առ քայլ ինտենսիվացնել մեր հարաբերությունները Հայաստանի հետ, և մեր համատեղ ընդունած հռչակագրի մեջ էլ դա ասվել է գրավոր: Դա ճիշտ ուղղությամբ ընթացող ճանապարհն է և պատմական շանս է Հայաստանի համար»,- նշել է Գերմանիայի կանցլերը: