«Էդմոն Մարուքյանը նոր մակարդակի երեսպաշտության մաստեր-կլաս է ցուցադրել»․ Ջուլիետա Ազարյան

ԱԺ «Քաղաքացիական պայմանագիր» խմբակցության պատգամավոր Ջուլիետա Ազարյանը ֆեյսբուքյան իր էջում տեսանյութ է տարածել՝ կից գրառմամբ․ «Factor TV-ի եթերում նախկին հատուկ հանձնարարություններով դեսպանը նոր մակարդակի երեսպաշտության մաստեր-կլաս է ցուցադրել։ Դերասանական խաղի բոլոր հնարքներն օգտագործելով՝ մեկ էլ հունից դուրս է գալիս, իբր մի կերպ հիշում իմ անունը ու հայտարարում, թե առաջին անգամ է լսում, որ կա նման պատգամավոր։
Էդմոնի այս հանկարծակի «քաղաքական ամնեզիան», սակայն, չափազանց ընտրողական է։
Ինձ հաստատ «չի հիշում»․ չնայած որ «Ելք»-ի ժամանակահատվածում բառացիորեն օր ու գիշեր աշխատում էինք կողք կողքի։ Չի հիշում նաև, որ իմ ընտանիքում տեղի ունեցած դժբախտ դեպքից հետո անձամբ էր եկել ցավակցելու։ Չի հիշում այն բազմաթիվ հանդիպումները, երբ ես Ավան վարչական շրջանի փոխթաղապետն էի, և գալիս էր հանրային քննարկումների՝ բարևում, խոսում, հետաքրքրվում իմ որպիսությամբ։
Գտնել չեմ կարողանում միայն այն նամակը, որով ժամանակին ինձ շնորհավորել էր պատգամավոր ընտրվելու կապակցությամբ, բայց, իհարկե, դա էլ է «մոռացել», կամ ես եմ սխալ հիշում, որ նման բան ևս եղել է։
Էդմոնը այսօր ոչինչ չի հիշում։
Նա հիշում է միայն իր «երրորդ ճանապարհը»՝ այն ճանապարհը, որով ժողովուրդը այդպես էլ ՉՑԱՆԿԱՑԱՎ ու չքայլեց»։