«ՀՀ սահման հասած օտարազգիները հավաքագրում են ռազմական ինֆորմացիա»․ Նաիրի Հոխիկյան

Լրագրող, հանրային գործիչ Նաիրի Հոխիկյանը գրում է․ «Ազգային անվտանգության ծառայությունը անուշադրության է մատնել Հայաստանի առաջնագծում օտարազգիների մուտքը կանխելու պարտավորությունը և զբաղված է պատարագ կազմակերպելով։
Հնդիկները, պարսիկները, արաբները, նույնիսկ պակիստանցիներն ու ադրբեջանցիները բանվորի անվան տակ գալիս են Հայաստան ու որպես էժան աշխատուժ հասնում սահման, ներգավվում բունկերների և այլ ամրաշինական աշխատանքների մեջ' բնականաբար հասանելիություն ստանալով մեր ռազմական գաղտնիքներին։
Իսկ ի՞նչ են անում Հայաստանի անվտանգային կառույցները։ Շինարարական կազմակերպություններին հորդորում են չնկարել սահմանային հատվածները։
Չե՞ն նկարում արդյոք։ Նկարում են։
Ավելին, սահման հասած օտարազգիները հավաքագրում են ամեն տեսակի ռազմական ինֆորմացիա և վերադառնում իրենց երկրներ, այնտեղից էլ' Թուրքիա կամ Ադրբեջան։ Իսկ հայկական շինարարական կազմակերպությունների մեծ մասը խուսափում է նրանց վճարել' միամտաբար կարծելով, թե խաբել, գցել է։
Արդարացումը, թե հայերը չեն աշխատում, դրա համար են օտարներին տանում, կեղծ է։ Պարզապես հայերին փող չտալ չեն կարող, հայերը գցողի հարցերը վատ ձևով կլուծեն, իսկ օտարազգիներին հեշտ է խաբել, ծեծել, սպառնալ, փող չտալ։ Դրանց մի մասն էլ քանի որ փողը ստանում է ոչ թե Հայաստանի ՊՆ -ից, այլ Ադրբեջանի ԱԱԾ -ից, չի էլ մտահոգվում, վերցնում է իր անհրաժեշտ ռազմական գաղտնի տեղեկությունները և, իբրև թե «գցված», հեռանում Հայաստանից»։