«2019թ․ կարգավորման պլանի շուրջ ծավալված խոսակցությունում կա մի կեղծ ելակետ»․ Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը․ «2019 թվականի կարգավորման պլանի շուրջ ծավալված այս ամբողջ խոսակցությունում կա մի հիմնարար կեղծ ելակետ, որի վրա փորձ է արվում կառուցել այսօր արդեն շատ հարմար «խաղաղասեր» լեգենդներ։
Այդ ժամանակաշրջանի ամենակարևոր կետը, եթե անկեղծ ենք, վերաբերում էր ոչ թե տարածքներին կամ Արցախի անորոշ կարգավիճակին, այլ միջազգային խաղաղապահների թեմային։ Ու հիմա ինչ-որ մեկը ուզում է մեզ համոզել, որ 2019-ին Հայաստանը կհամաձայներ միջազգային խաղաղապահների տեղակայմանն Արցախում, և դրան հանգիստ կհամաձայներ նաև պաշտոնական Ստեփանակերտը։ Իրո՞ք որևէ մեկը սրան լուրջ հավատում է։
Հայաստանն այդ ժամանակ չուներ իրական անկախության, ինքնուրույն պաշտպանության ու անվտանգության քաղաքականություն, և հիմա զուր մի փորձեք տպավորություն ստեղծել, թե իբր եղել է կարգավորման կախարդական մի տարբերակ, որը բոլորը պատրաստ էին ընդունելու, միայն թե ինչ–որ մեկը «չստորագրեց»։
Չի կարելի ժողովրդի ցավի, պատերազմի զոհերի հիշատակի, Արցախի կորստի վրա կառուցել կեղծ խաղաղասիրական լեգենդներ։ Եթե ուզում ենք հասկանալ, թե ինչ է եղել, պետք է խոսենք ոչ թե չկողմնորոշված միջազգային խաղաղապահների մասին, այլ մեր պետական չկայացածության, մեր անվտանգային մտքի բացակայության և այն փաստի մասին, որ ինքներս մեզ տարիներով պահել ենք կախված մի ուժից, որը վերջում առանց երկմտելու Արցախը փոխանակեց ուրիշների հետ։
Հետին խելքի հերոսությամբ պետություն չեն կառուցում»։